aatsitassat
Napasup eqqaani nikkelimik suliniut
Napasup eqqaani aatsitassanik suliniummi nutaami kalaallit arlallit sulisorineqarput
North American Nickel Maniitsup kujataani Napasup eqqaani nikkelimik aatsitassanillu allanik ujaasilluni ukioq manna qillerileruttorpoq, Qeqqata Kommuniata nittartagaani allaaserisami allassimavoq.
North American Nickel canadamiut selskaberaat aatsitassanik ujaasisoq, ukiorpaalunnilu Napasup eqqaani ujaasisimasoq.
Selskabip pisortaata Mark Fedikow-ip oqaatigaa ukioq manna tammaarsimafferujussuarmik sanasimallutik, tassani inuit 34-t sulillutik, ujarassiuut, geofysikerit, qillerisut ikiortillu igasorlu ilaallu ilanngullugit, allaaserisami allassimavoq.
Sulisut tamakkua ilagaat kalaallit qulingiluat, assigiinngitsunik suliallit.
– Aamma kalaallinik atorfinitsitsisimavugut, tamakkualu pilersuinermi, pilersaarusiornermi angalanernillu aaqqissuussinerni ikiorpaatigut, pisortaq paasissutissiivoq.
North American Nickelip Napasup eqqaani ujaasinermi programmianut ilaapput geofysiskimik ujaasineq, nikkel-imik atortussiassanillu allanik soorlu kanngussammik platin-imillu, qillerinissamut piareersarneq qillerinerlu. 2012-imi 2013-imilu ujaasinerit nanginneraat.
Maannakkorpiaq Imiak Hill-imi nikkelimik ujaasilluni qillerisoqarpoq, qillerinerlu alla qanittukkut tamaani aallartinneqassaaq.
– Pilersaarutigaarput ukioq manna minnerpaamik 4.700 meterinik qilleriniarluta, neriuppugullu septembari ilanngullugu ingerlatsisinnaassalluta. Geofysiskimik ujaasineq ataavartumik ingerlatsineruvoq, nittartagaq naapertorlugu Mark Ferdikow oqarpoq.
– NIkittarlutik sulisuvut siulliit aallarteqqammerput ujaasinermut programmerput kipitinnagu, tamannalu tulluusimaarutigeqaarput, selskabip pisortaa oqarpoq.
Siunissami qaninnerpaami North American Nickelip Maniitsup eqqaani nunaqarfiit tikeraartassavai innuttaasut paasissutissillugit sunik ujarlertoqartoq, qanoq isilluni, siunissamullu pilersaarutit suunersut, Qeqqata Kommuniata nittartagaani allaaserisami allassimavoq.
Nikkelimik suliniut pillugu annertunerusumik atuarit Oil and Minerals-imi, ataani akeqanangitsumik aasinnaavat.