Nuuk

Napa nerisassat igiinnartakkat pillugit paasisitsiniaassaaq

Nuuk Centerimi arfininngorpat nerisassat igiinnartakkat pillugit sammisaqartitsisoqassaaq

Napa Nuuk Centerimi arfininngorpat sammisaqartitsissaaq

Nerisassat amerlavallaarujussuartut eqqaannarneqartarput. Maangaannartitsisarneq nunarsuarmi ajornartorsiutaaleriartuinnartoq angerlarsimaffitsinni pinaveersaartiitigalugu atuisartutut iliuuseqarfigisinnaavarput.

Nunani Avannarlerni Piorsarsimassutsikkut Attaveqaat, Napa, tusagassiutinut nalunaaruteqarpoq.

Taamaattumik nerisassanik igitsiinnartarneq pillugu Napa arfininngorpat sammisaqartitsissaaq. Taanna Nuuk Centerimi ingerlanneqassaaq.

Eqqaaginnartarneq pillugu paasititsiniaasoqassaaq atuisartutullu eqqaaginnarneq millisarlugu iliuuseqarsinnaanerit ilisimalerlugu. Nuuk Centerimi aamma assigiinngitsunik unammisitsisoqassaaq.

Meeqqat atuarfii Nuummiittut tamaasa sapaatip akunnerani matumani Napamit pulaarneqassapput. Ilaatigut nukarliit angajulliillu inuussutissanik maangaannartitsisarneq pillugu suleqatigineqassapput.

- Pulaarnitta kinguneri arfininngorpat novembarip 15-iani pisussami takuneqarsinnaajumaarput – tassaasut nukarliit eqqakkanik eqqumiitsuliaat angajulliillu iggarinneqqusaannerat, Napamit nalunaarutigineqarpoq. Nangipporlu:

- Plakatinik saqqummersitsineq Think.Eat.Save Nuuk Centerimi sap.ak. 46 tamaat ammassaaq. Saqqummersitsineq Nunani Avannarlerni Ministerit Siunnersuisoqatigiiffiata aamma Naalagaaffiit Peqatigiit suleqatigiissutaat maangaannartitsisarnermik akiuiniarluni suliniummut atatillugu unammisitsinermik aallaaveqarpoq, ajugaassutaasullu 14-it saqqummersinneqartut sinerissami katersugaasivinni aamma saqqummersinneqarumaarput.

Powered by Labrador CMS