Nanortalik
Nanortalimmi palasit ataatsimiinnerat ilagiinni nuannarineqarpoq
Nanortalimmi sapaammi ualikkut ataasinngornermilu unnukkut naalagiartitsinerit ornigarneqarluarput
Palasit 34-saannik ataatsimiinnerat silamik pissuteqartumik kinguaattooraluarluni pisarnertut naalagiaqatigiinnermik aallarnerneqarpoq sapaatiummat. Biskopi Sofie Petersen siuttoralugu palasit oqaluffimmut inoqaqisumut ingerlaaqatigiipput, Uummannallu palasianit Ludvig Fleischer-imit naalagiaqatigiinneq ingerlanneqarluni.
Ataasinngornermi unnukkut ilagiit oqaluffimmi Pinngortitsisumut qujaniarnermik unnersiutiginninnermillu qinoqatigiinneqarpoq. Ingerlatsisoralugit palasit Nukannguaq A. Petrussen kiisalu Aviaja R. Pedersen. Pingortitsisumut qujaniutitut ilaatigut orsoq iginneq, puisip neqaanik nikkut, aalisakkat panertut ruuallu palasiusunit oqaluffimmut eqqunneqarput pinngortitap tunniussai qujassutigineqarlutik. Oqaluffiullu ilua ilagiit sinniisaannit kusanaqisumik pinnersarneqarsimalluni, ilagiit allattoqarfianni pisortaq Morten Nornild Sermitsiaq.AG-mut oqarpoq.
Palasit Nanortallip nunaqarfiinnut tallimanut naalagiartitsippata palasit ataatsimiinnerat pisortatigoortumik naammassissasoq oqaatigineqarpoq.
Assit pingasut ataani takukkit