Nanortalimmi anorisaatinik suliniut tupigusuutigineqartoq
Nukissiorfiit pilersaarutigaa Nanortalimmi anorisaammik anginerusumik ataatsimik marlunnilluunniit inissiinissani. Tamanna pilersaarutinut, siusinnerusukkut saqqummiunneqarsimasunut akerliuvoq, nukissiorfiup namminersortup Nanoq Powerip pisortaa oqarpoq, taassumalu anorisaatinik suliniummik ingerlatsineq, pilersaarut aningaasaqarnerlu apeqquuserpaa.
Utoqqarmiut Kangerluarsunnguanni erngup nukinganik nukissiorfiup ukiunik 25-inngortorsiorneranut atatillugu Nukissiorfiit nalliuttorsiornermi quppersagaliaanni allassimavoq anorisaatit atorneqarsinnaassusiat Sisimiuni Nanortalimmilu Nukissiorfiit misissuiffigileruttoraa.
Nukissiorfimmi namminersortumi Nanoq Powerimi tupigusuutigineqarpoq Nukissiorfiit aalajangersimammata Nanortalimmi anorisaatinik inissiinissamik, tassa suliffeqarfik tassanerpiaq, Nanortallip eqqaani, erngup nukinganik ineriartortitsinissaminik qinnuteqaamminut ukiup affaata matuma siornatigut itigartinneqarsimammat.
Naammagittaalliuut
Taamani tamanna pivoq tunngavilersuutigalugu Namminersorlutik Oqartussat kissaatigigaat erngup nukinganik misissueqqaarnissamut akuersissut Nukissiorfinnut tunniunneqassasoq. Tamannalu pisimavoq Inuussutissarsiornermut Naalakkersuisoqarfiup siunnersuineratigut, Nanoq Power Nukissiorfinnit siulliulluni misissueqqaarnissamut akuersissummik qinnuteqarsimagaluartoq. Nanoq Power kingorna suliassami takunnissinnaanermut ilaannakortumik akuerineqarpoq, taannalu tunuliaqutaralugu ombudsmandimut maalaaruteqarluni, suliassarlu tassani suli ingerlavoq.
Svend Hardenberg naapertorlugu ombudsmandip Inuussutissarsiornermut Naalakkersuisoqarfik suliamut oqaaseqaateqartinniarlugu arlaleriarluni saaffigisarsimavaa, kiisalu bilagit tunngassutillit tamaasa piumasimallugit.
– Maannalu paasinarsivoq Nukissiorfiit Nanortalimmi anorisaatinik inissiinialersoq pisimasumi maluginiagassaalluinnartumi. Tassami pineqarput anorisaatit nukissiuutit anginerit ataaseq marlulluunniit tamarmik 0,7 megawattimik pilersuisinnaasut, illoqarfimmik pilersuinermut katillutik 1,4 megawattimik pilersuisinnaassallutik. Taava illoqarfiup eqqaani erngup nukinganik nukissiorfimmik sanasoqarsinnaassanngilaq, Svend Hardenberg Sermitsiamut oqarpoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiaiuk: