Nanoq.gl tassaalerpoq naalakkersuisut.gl
Namminersorlutik oqartussat nittartagaat nutarteqqinneqarluni ilaatigut nutaamik atitaarsimavoq
Immaqa malugisimajunnarsivat nanoq.gl-imut iseruit taanna ingerlaannartumik nammineq naalakkersuisut.gl nikittalersimammat.
Taamaattoqalerpoq pissutigalugu namminersorlutik oqartussat nittartagaat nutartersimammat imaluunniit ilusia allanngorsimammat.
Nittartakkap nutarternissaa pisariaqalivippoq innuttaasunut sullissinermut tunngasut 2012-imi sullissivik.gl-imut nuunneqarnerisa kingorna, aamma nittartakkap piginnaasai annertusartariaqalermata teknikkikkut aaqqissuussamik nutaamik atuilernerup nassataanik, namminersorlutik oqartussanit tutsiuppoq.
Taamaattumik nittartagaq nutaaq tassaavoq naalakkersuisut nittartagaat tamannalu ersersinniarlugu nutaamik atitaarpoq – naalakkersuisut.gl.
- Nittartagaq nutaaq allaserisat, assit aamma nipit atorlugit oqaluttuartuussaaq suut Naalakkersuisunit aallunneqarnersut aamma allaffeqarfimmit suut isumagineqarnersut, tamakkualu Kalaallit Nunaannit nunaniillu allanit paasisassarsiorfigineqarsinnaaqqullugit, Siulittaasup allaffeqarfianit pisortaagallartoq Søren Stach Nielsen oqarpoq.
Nittartakkap aqqa nanoq.gl emailadressinut tunngatillugu allannguuteqanngilaq.