Nanoq Beerip akiliisinnaajunnaarnera pisortanut 1,6 million koruuninik akeqartitsivoq

Immiorfeeqqap Nanoq Beerip 2013-imi akiliisinnaajunnaarneranut atatillugu Namminersorlutik Oqartussat aamma nunatta karsiata annaasaqaatai minnerpaamik 1.622.384 koruuniupput.

Inuussutissarsiornermut naalakkersuisup, Vittus Qujaukitsup (S), Inuit Ataqatigiinneersumut Aqqaluaq B. Egedemut akissuteqaataani tamanna takuneqarsinnaavoq.

Atuaruk: Nanoq Beer pinngitsaalisamik matuteqquvaa

Taakku aningaasat amerlassusaat ingerlatseqatigiiffimmi, Siumumi politikerip Jørgen Wæver Johansenip kiisalu Gerhardt Petersenip ingerlassimasaanni akiligassaapput.

• 179.408 koruunit akileraarutinut akitsuutinullu akiliuteqarsimannginnermut
• 120.000 koruunit immiornermut akitsuutinut akiliuteqarsimannginnermut. Akileraartarnermut Aqutsisoqarfiulli tamanna paasimmagu, akiliisinnaajunnaartumut piumasaqaat nalunaarutigissallugu kingusinaareersimavoq.
• 687.871 koruunit, Namminersorlutik Oqartussat aningaasaliisarnermut ingerlatseqatigiiffiat Greenland Venturep Nanoq Beerimi piginneqataassutai. Piginneqataassut 43,46 procentiuvoq.
• 611.105 koruunit, Greenland Venturep ingerlatseqatigiiffimmut taarsigassarsiissutigisimasai.
• 24.000 koruunit Namminersorlutik Oqartussanut royaltynut akitsuutinut akiliuteqarsimannginnermut

Taarsiagassarsinermut qularnaveeqqut
Taassuma saniatigut Namminersorlutik Oqartussat taarsigassarsianut qularnaveeqqusiisimavoq, taanna Nanoq Beerip aningaasaateqarfimmut atorsimavaa.

Qularnaveeqqusiissuteqarneq inuussutissarsiuteqarnerup siuarsarneqarnissaat pillugit Inatsisartut inatsisaat 2001-meersoq naapertorlugu pivoq. Akiliisinnaajunnaarnerlu piviusunngormat, Namminersorlutik Oqartussat akisussaaffimmik tigusisariaqalerput. Akissuteqaammili aningaasat qanoq amerlatiginerat oqaatigineqanngilaq.

Atuaruk: Erseqqissumik paasisaqarusuttut

Suliaq matuneqareersoq
Vittus Qujaukitsup Aqqaluaq B. Egedemut akissutaani aamma takuneqarsinnaavoq, suliaq pillugu inatsisitigut kinguneqartitsisoqassanngitsoq.

Akiliisinnaajunnaartumut nakkutiginnittoq, eqqartuussissuserisoq Jens Paulsen, Paulsen/Keldsen, Nuuk, akiliisinnaajunnaarnerup kingorna politiinukarpoq, unioqqutitsisoqarsimanersorlu nalileqqullugu. Namminersorlutik Oqartussanut imigassamut akitsuutit nalunaarutigineqarsimannginnerat paasineqarmat, saaffiginninneq pivoq.

Kisianni akissummi takuneqarsinnaavoq, politiit kingusinnerusukkut suliap malersoqqinnissaa unitsikkaat - tunngavigineqarpiartorli ilisimaqqissaarneqarani.

Aningaasaliisut akisussaasut?
Suliami tassani akisussaatitsinissamut tunngavissaqarsinnaanersoq Akileraartarnermut Aqutsisoqarfiup aamma isumaliutersuutigisimavaa, kisianni paasissutissat pigineqartut, suliassaqarfimmi suleriaatsit aammalu isumalluutinik atuinissaq, suliamut taamaattumut atatillugu naatsorsuutigineqarsinnaasoq eqqarsaatigalugit, apeqqutip taassuma ingerlateqqinnginnissaa aalajangiussimallugu.