Nanoq Beer pinngitsaalisamik matuteqquvaa

Nanoq Beer Greenland ApS, 2011-mi tunngavilerneqartoq, ajornartorsiulerpoq.
Tamanna pivoq Danmarkimi Erhvervsstyrelsip Kalaallit Nunaata Eqqartuussivia qinnuigimmagu kujataani Narsami immiaaraliorfik pinngitsaalisamik matoqqullugu. Taamatut qinnuteqarpoq pissutigalugu Nanoq Beer Greenlandiip ukiumut naatsorsuutinik kukkunersiorsimasunik ukiumut naatsorsuutinut inatsisikkut piumasaqaat naammassisimanngimmagu.
Tamanna tunngavigalugu Demokraatit sinnerlugit Inatsisartunut ilaasortap Palle Christiansenip paragraf 37 naapertorlugu inuussutissarsiornermut, aatsitassanut sulisartoqarnermullu Naalakkersuisoq Jens-Erik Kirkegaard, Siumut, arlalinnik apeqquteqarfigaa, pissutigalugu Greenland Venture A/S namminersorlutik oqartussanit pigineqartoq Nanoq Beer Greenlandimik piginneqataammat, ingerlatsivimmilu ajornartorsiortumi piginneqatigiissutit 43,46 procentii pigalugit.
Atuaruk: "Sednap kunngikkut meriarfigai"
Palle Christiansenip ilaatigut apeqqutigaa immiaaraliorfiup pinngitsaalisamik matuneqarnissaanut akisussaasut Naalakkersuisut politiinut tunniutissamaarneraat.
– Tunngaviit pigineqartut tunngavigalugit immiaaraliorfimmi aqutsisut akisussaasut Naalakkersuisut politiinut nalunaarutiginianngilaat. Danmarkimi Erhvervsstyrelsip naatsorsuutinut inatsit aamma selskabinut inatsit oqartussaaffigai. Taamaattumik selskabimut pillaatissamik Erhvervsstyrelsi aalajangiissaaq, ukiumut naatsorsuutinik tunniussinnginnera pissutigalugu, Jens-Erik Kirkegaard nassuiaavoq.
Greenland Venturep paasissutissiissutigaa selskabip qinnutigisimagaa siulersuisut ataatsimiinnissamut qaaqquneqassasut, tassani selskabip inissisimanera oqaluuserineqassalluni.