Nanook nipilersornermut nersornaammut akimasumut innersuunneqartoq

Nipilersoqatigiit nersornaammut nipilersortartut allat 12-it unammillugit innersuunneqarput, nipilersoqatigiit assigiinngitsorujussuarnik nipilersoriaasillit.

Helsingforsimi nersornaasiineq
Nunatsinni naliliisarnermut ataatsimiititaliamut ilaasortat nipilersortartut innersuuppaat. Nunani Avannarlerni Siunnersuisoqatigiit nipilersortartunut nersornaasiineranut ajugaasoq novembarip aallaqqaataani Finlandiahusetimi Helsingforsimi saqqummiunneqassaaq.

Nersornaatip nipilersukkanik eqqumiitsuliornikkut qaffasissumik pilersitsinermik atuinerlu pingaartitaraa. Nersornaat ukioq allortarlugu erinniortumut tunniunneqartarpoq, ukiorlu allortarlugu 350.000 koruunit akissarsititsissutigineqartarput.

Misigisaq nuannerpoq
- Nipilersortartutut malugineqarluni misigisaq nuannerpoq, Nunanilu Avannarlernut nersornaammut innersuunneqarluni nutaajullunilu uagutsinnut annertuvoq. Angusat aamma suliat ukiuni kingullerni ingerlatagut nersorneqartut iluarpoq. Innersuunneqarneq aamma nersornaammik taamaattumik ajugaasinnaanerput nuannaartitsivoq, innersuunneqartunilu Kalaallit Nunaat sinnerlugu innersuunneqarnerput tulluusimaarutigaarput, neriuppugullu nunarput aamma tulluusimaartoq, Christian Elsner oqarpoq.

Nipilersoqatigiit ukiormanna tusarnaartitseqattaanngikkallartut, taarsiullugulu taalliorlutik nutaanik erinniornermut piffissaq atorlugu ilisimatitsivoq. Aappaagu Kalaallit Nunaanni tusarnaartitseqattaarnissaq pilersaarutigaat, Canadamut aamma Ruslandimut nipilersoriarnissamut aamma qaaqqusaareersimapput.

- Taamaammat nipilersoqatigiit uninngaannartuunngilagut, taamatullu innersuunneqarnermut piumassusinitsitsiinnarpoq, Christian Elsner oqarpoq.

Tusarnaartitsinerpassuit
Nipilersoqatigiit nunani assigiinngitsorpassuarni tusarnaartitsinikuupput, USA, Japan, Canada, Savalimmiut, Danmark, Island, Norge aamma Finland, nuuteeqqallu 15.000-init amerlanerit tuninikuuaat.

Nipilersoqatigiinni nipilersoqataasut tassaapput qatanngutigiit Elsner, Martin Zinck, Andreas Otte aamma Mads Røn.