Ulorianartorsiorneq
Nannunut peberspray atorlugit
Assersuutigalugu Tunumi nannut ersisaarnissaannut pebersprayt aqerlullu gummit atorneqarsinnaanerat namminersorlutik oqartussat misissorpaat
Siunissami nannut qaninniarpallaartut peberspraynik aqerlunillu gumminik ersisaarlugit qimaatinniarneqartarsinnaapput.
Taamatut aalisarnermut piniarnermullu Naalakkersuisoq Karl-Kristian Kruse Inuit Ataqatigiinneersumut Ane Hansenimut akissummini paasissutissiivoq.
Taassuma apeqqutigisimavaa Ittoqqortoormiini nannut innuttaasunik ersiortitsisut amerligaluttuinnartut Naalakkersuisoq qanoq iliuuseqarfiginiarneraat.
Nunanit allanit misilittakkat
Naalakkersuisunut ilaasortaq akissummini allappoq Aalisarnermut Piniarnermullu Naalakkersuisoqarfik Canadamut, Norgemut USA-mullu saaffiginnissimasoq nannunik najugaqarfinnut qaninngoortunik qanoq isillutik qimaatitsiniartarnerannik paasiniaalluni.
Inatsit allanngortillugu
– Canadamiut, norskit amerikarmiullu ilisimatuut peberspraynik aqerlunillu gumminik atuinermik misilittagaqarluarsimapput, taamaattumik aaqqiissutissap tamassuma atornissaanut periarfissat misissulerpavut. Inatsisitigut apeqqutit arlallit qulaajarneqassapput, pissutigalugu peberspraynik atuineq Kalaallit Nunaanni inerteqqutaammat. Tamatuma saniatitut paasiniassavarput aqerlut gummit qanoq ittut atorneqassanersut. Issittumi Sakkutooqarfiup pebersprayt aqerlullu gummit misiligassavai, Karl-Kristian Kruse paasissutissiivoq.