Nannunik immikkut nakkutilliineq

Ittoqqortoormiut eqqaani nannut amerlatsikkiartuinnarmata WWF nannunik nakkutilliinerulerniarpoq.

Nakkutilliisut naliginnaasumik juulli nallertinnagu nakkutilliinertik unitsittaraluarpaat aatsaallu 1. august nakkutilliineq aallarteqqittarlugu. Martsillu qaammataani nannuttassat tamakkerneqarnerisa kingorna Uunartip eqqaani Jan Lorentzen nannumit saassunneqarsimanera peqqutigalugu WWF iliuuseqartariaqalerpoq.

- Illoqarfimmi innuttaasut illersorniarlugit aprilip qaammataani nakkutilliinerput aallarteqqittariaqarsimavarput, Kaare Winther Hansen WWF Kalaallit Nunaanni immikkoortoqarfianeersoq Sermitsiaq.AG-mut oqarpoq.

WWF-illu nakkutilliiartortitaa, Aage Kunak, suliassaaleqisimanngilaq. Taassumalu nakkutilliinerneraniit pisut qulit nalunaarutigineqarsimapput.

- Ukioq manna nannut amerlasimaqaat, Aage Kunak Sermitsiaq.AG-mut oqarpoq.

Uunartip eqqaani illoqarfimmiit kujammut kilometerit arfineq-marlunnik ungasissuseqartumi pisut amerlanerit pisimapput. Tassani innuttaasut illuaraateqarput takornarissaniillu ornigarneqartarluni.

Ittoqqortoormiillu eqqaaviata tipiliortarnera nannut aamma illoqarfiliassutigisalersimavaat.

Sumiiffimmi nannumik nalunaarutiginnittoqartillugu Aage Kunak orniguttarpoq aallaammillu ingeriussilluni nannut qimaatinniarsarisarlugit. Tamanna nakkutilliisoq Erling Madsen suleqatigalugu pinerusarpoq.

- Nannunnik nakkutilliineq aaqqiissutaalluarpoq, piniarnermut nakkutilliisoq oqarpoq.

Ukiamiit upernaamut siku annertusimanngilaq kingunerisaanillu nannut amerlalluinnarsimallutik.

Ukioq mannali nannut takuttartut amerlanerusimaqaat sivisunerusumillu takkusimasarlutik. Oktobarip qaammataani sikuulluartillugu nannut nerisassarsiorsinnaasaraluarput. Novembarillu qaammataani aatsaat takkuttalersimapput, ukioq mannalu upernaleqqaarneraniit aamma taama pisoqarpoq.

- Upernaakkut pisassiissutit tamakkerneqarnerisa kingorna nakkutilliinerup sivitsorneqarnera ataavartunngussanersoq eqqarsaatigaarput, Kaare Winther Hansen oqarpoq.

Maannamut nakkutilliineq aggustip qaammataani atualerfiup nalaani aallartinneqarpoq, meeqqallu isumannaatsumik atuariartornissaat anguniarlugu nalunaaqutaq 06-08 nakkutilliisoqartarluni. Maanna pisariaqartitsineq aallavigalugu nakkutilliisoqartarpoq.