Nannunik alapernaarsuisut nannunik annaassipput

Ittoqqortoormiini nannunik alapernaarsuineq Verdensnaturfonden WWF-ip iluatsilluarnerapaa.

Tamatumami nannut imminut illersorniarluni toqunneqartarnerat pinngitsoortissimavaa.

Alapernaarsuisarneq aggustimi siorna dececmbari ilanngullugu illoqarfik nannunit arfineq-pingasoriarluni tikinneqartarsimavoq. Tamatigullu nannut aallaanagit qimaatinneqartarnerat iluatsinneqarsimavoq.

- Nannumik imminut illersorniarluni aallaannittoqartariaqarsimannginnera nuannaarutigisorujussuuarput, suliniummik ataqatigiissaarisoq Kaare Winther Hansen WWF-imeersoq tusagassiuutinut nalunaarummi oqarpoq.

Nannunik alapernaarsuisut siorna imassanik gumminik nannunut atuisalerput, tamannalu sunniuteqarluarsimavoq.

Nannunik alapernaarsuisartut WWF-imit najugaqartut peqatigalugit 2015-imi pilersinneqarpoq. Tamanna illoqarfiup innuttaasuisa akornanni toqqissisimanermik pilersitsissaaq aamma pisassiissutit tamakkereerneranni nannut imminut illersorniarluni aallaaneqartannginnissaat anguneqassaaq.

Ullaat tamaasa atuariartortoqannginnerani ''nanoqarnerpaaffiani'' nannunik illoqarfimmi alapernaarsuisarpoq.

Sikup aakkiartornera ilutigalugu nannut inuillu aporaattarneri amerleriapiloornikuupput. Nannut maanna piffissami sivisunerusumi nunamiittalerput, najugaqarfinnilu nerisassat tikkinut ussagartarput.

- Piffissami silap pissusiata allanngoriartornerani nannut ikiliartupiloornissaanni pisassiissutaasut qaangerlugit pisarinaveersaarnissaat pisariaqarpoq, suliniummik ataqatigiissaarisoq Kaare Winther Hansen WWF-imeersoq oqarpoq.

Alapernaarsuineq pingaarutilimmik allannguisoq, piniarnermut nakkutilliisoq Erling Madsen isumaqarpoq:

- Naak nannut ingerlaannaq aallaaneqarneranut taarsiullugu qimaatinniarlugit periuseq amerlasuut qularisimagaluaraat iluaqutaasoq takusinnaavarput. Illoqarfimmilu maani innuttaasut alapernaarsuisaleratta toqqissisimanerulerput, Erling Madsen oqarpoq.