Vittusip pilersaarutaa
Namminiilivinneq ima aningaasalersorneqassaaq
Amerikarmiut oliemit aningaasaataat Danmarkimut atajunnaarnissaq akilersinnaavaat
Kalaallit Nunaata namminersulivinnissaa qanorlu ililluni aningaasat tungaatigut imminut napatinnissaa Vittus Qujaukitsup aqqutissiuutissallugu pilersaaruteqarpoq.
Arctic Circle Forum-imi ulluni makkunani Quebec-imi ingerlanneqartumi amerikami naalakkersuisunngortussanut suleqatiserinnippoq. Canadamiut nutaarsiassaqartitsiviat naapertorlugu Vittus Qujaukitsoq oqalugiarnermini Nunatsinni oliesiulersinnaanermut misissueqqilernissamut periarfissat eqqaavai.
- Donald Trumpip præsidentitut qinigaanerani Kalaallit Nunaata USA-mit tapersersorneqarluni oliemik gas-imillu piaanikkut namminiilivinnissaq aningaasalersorneqassasoq neriulluaatigigaa, Qujaukitsoq Quebec-imi ataasinngormat oqaaseqarnermini eqqaavaa.
Rex Tillerson amerikami nunanut allanut naalakkersuisunngussappat Kalaallit Nunaata tapersersoraa Qujaukitsup aamma oqaatigigaa Nunatsuaqonline allaaserisaqarpoq.
Atuaruk: Vittusip Danmark USA-lu sioorasaarpai
Rex Tillerson 64-nik ukiulik Texasermioq oliesioqatigiiffimmi ExxonMobilimi pisortaavoq. 2015-milu nunarsuarmi pissaaneqarnepaatut nr. 25-mi inissisimasutut suaarutigineqarnikuulluni. Ruslandimi Præsidenti Vladimir Putin suleqatiginera aamma ilisimaneqaatigaa. Nunanullu allanut naalakkersuisunngussagaluarpat isummanik aporaaffinngussasoq ilimagineqarluni. Amerikami præsidentimut qinikkap ullumi marlunngornermi kikkut naalakkersuisutut ivertinneqassanersut twitterimi suaarutigissallugit neriorsuutiginikuuaa.
Vittus Qujaukitsup Arctic Circle Forumimi oqalugiataa tamakkerlugu pissarsiarinissaa Sermitsiaq.AG-p sulissutigaa.
Atuaruk: Danskit politikerit oqaaseqarumanngitsut