naalagaaffeqatigiit siunissaat
Namminersornermik tunngaviusunillu inatsiseqalernissamik oqalunneq 'akeqanngitsumik oqalunneruvoq'
Foreningen Rigsfælleskabet-ip siulittaasuata Nauja Lyngep namminersulernissamik oqallinneq isumaliutersuummi saqqummiuppaa
Ukiuni kingullerni Naalagaaffeqatigiinnermik oqallinnermi pipallatamik namminersulernissaq sammineqarsimavoq, tamannalu sakkortuseriarneqarsimavoq Aleqa Hammondimit, taamatut isumaqarpoq Foreningen Rigsfælleskabet-ip siuittaasua Nauja Lynge.
Thorning ikiorsiullugu
´Namminersulernissamik namminerlu tunngaviusunik inatsiseqalernissamik oqalunneq ´akeqanngitsumik oqalunnertut´ isigaara, Nauja Lynge allappoq. Peqatigiiffik isumaqarpoq ministeriuneq akuleruttariaqartoq, Kalaallit Nunaatalu isumannaatsumik ingerlaffeqarnissaanik ikiuuteqataalluni.
Naalakkersuisut siulittaasuat nersualaarpaa
Kalaallit Nunaata ilorraap tungaanut ingerlanissaanut pisariaqarpoq namminersornissamik isummat tamarmik ataatsimut isiginiarnissaat, aammalu Danmarkimik kinguneqartussamik oqaloqatiginninnissaq, Nauja Lynge oqarpoq, Naalakkersuisullu siulittaasuat nutaaq Siumumeersoq Kim Kielsen nersualaarlugu.
´Maanna Naalakkersuisut siulittaasuata, Kim Kielsenip, tamanna pillugu oqalunnerit allanngortimmagit, tamanna pingaaruteqartorujussuuvoq. Isumaqarpunga Kim Kielsenip takunnissinnaassutsini takutikkaa oqarluni namminersulernissaq piviusorpalaanngistoq´, taanna isumaliutersuummini allappoq.