Pinngortitami ajunaarnersuaq
Namminersorlutik Oqartussat Uummannap eqqaani eqqugaasunut ikiuunnissaanik akuerineqarput
Uummannap eqqaani eqqugaasunut aningaasat katersorneqarsimasut Naalakkersuisunit tapiissutissatut atorneqarnissaat tallimanngornermi akuersissutigineqarput.
Uummannap avannaatungaani ajunaarnersuaqarnera tunngavigalugu Naalakkersuisut aningaasaliinissaannut piginnaatitsissutit arlallit Inatsisartut Aningaasaqarnermut Akileraartarnermullu Ataatsimiititaliap tallimanngornermi immikkut ittumik ataatsimiinnermini akuersissutigai.
Naalakkersuisut tusagassiuutinut nalunaarummi allapput, tassani aamma erserpoq aningaasat tunissutigineqarsimasut Naalakkersuisut atorsinnaangaat akuersissutigineqartoq.
- Tapersiineruvoq innuttaasut tamaasa sinnerlugit Naalakkersuisunit qujarullugu tiguneqartoq, Aningaasaqarnermut Akileraartarnermullu Naalakkersuisoq Aqqaluaq B. Egede oqarpoq.
Aningaasaqarnermut inatsimmi konto nutaaq
Naalakkersuisut ajunaarnersuaqarneranut tunngatillugu Aningaasaqarnermik Inatsimmi kontoliorsimapput, aningaasallu taakku qimangussorneqarsimasut atisanik pisiniutissaannut, piniarnermik atortussarsiniutissaannut initaaqqinnissaannut il.il. atorneqassapput.
Aningaasallu illugisaasa napparterneqaqqinnissaannut atorneqarsinnaanngillat.
- Oqaasertaliussat Nuugaatsiami assigisaaniluunniit nammineq inissiamik nutaamik pisinermut, maanna inigisat pilersinneqaqqinnerannut, attaveqaatinik pisortalluunniit illuutaannik nappaaqqinnerni assigisaannullu toqqammaviusinnaanngillat, aalajangiinermi ilanngussami allassimasoqarpoq.
Nunanit allanit aningaasat
Aningaasaqarnermut Inatsimmi aningaasat saniatigut nunat allat tapiissuteqarusullutik aamma tunissuteqarsimapput. Tapiissutinullu taakkununnga aamma kontoliuunneqarsimapput. Aningaasat taakku ilaatigut qimangussorneqarsimasunut tapiissutitut pequtisiniutissaannulli atorneqassapput.
- Aningaasat ilaatigut qimminik qimarnussuinermi nerukkaatissarsinermilu, pequtinik pigisanillu allanik pisinermi, piniutinik pissarseqqinnermi, inissinneqaqqinnermi, tassunga ilanngullugu inigilivigassamik inissinneqaqqinnermi, innuttaasut eqqugaasut qularnaariffigineqarnerannut il.il. atorneqarnissaat naatsorsuutigineqarpoq.