Wednesday, October 11, 2017 - 13:40

Namminersorlutik Oqartussat umiarsualiviit 70-t pigiunnaarniarpaat

Assi.: Jørgen Schultz-Nielsen
Kommunit aamma namminersortut umiarsualivinnut oqartuusaalernissaannut, umiarsuarnut pilersaarut nutaaq aqqutissiuissaaq.

Attaveqaqatigiinnermut naalakkersuisoq, Erik Jensen, marlunngornermi tusagassiortunik katersortitsinermini tamanna naqissuserpaa, tassani nunatsinni umiarsualiviit pillugit anguniakkat saqqummiunneqarput.

Umiarsualivinnut pilersaarut 2027-ip tungaanut atuuttussaq ukiup naalernerani saqqumminneqarnissaa naatsorsuutigineqarpoq, taassuma Nunatsinni umiarsualiveqarfiit Namminersorlutik Oqartussat maanna siunissamilu pisussaaffiinut iluaqutaasinnaanissaat qulakkiissavaa.

Nunatsinni umiarsualiviunni piusuni aserfallatsaaliuinermi kinguaattoorutit 270 millionit koruuniusut takuneqarsinnaavoq. Pilersaarut eqquutsinneqassappat, aningaasat taakku 143 millionit koruuninut appartinneqarsinnaassapput.

Tamanna umiarsualiveqarfiit 70-it kommuninut imaluunniit suliffeqarfinnut namminersortunut tunineqarnerisigut pissapput. Piiarneqarsinnaallutilluunniit, tamanna Erik Jensenip saqqummiussaani atuarneqarsinnaavoq.

Umiarsualiveqarfiit 95-it tulleriiaarneqassapput, 70-it sinneruttut tunineqassallutik.

Siunissami umiarsualiviit takorluukkanut ''umiarsulaliveqarfiit multipurpose'', tassa tamanut atuuttut, ilaapput, tassani inuussutissarsiortut assigiinngitsut atuisinnaallutik.

Talittarfiit qajannaallisarneqassapput, taamaalillutillu angallattunut, usinut oqimaatsunut atorneqarsinnaassapput aammalu aalisarnermik inuussutissarsiuteqartunut iluaqutaasinnaassallutik, Erik Jensen oqaluttuarpoq.

- Talittarfiit nutarterneqassapput, tinittarneranut ulittarneranullu majuartarfinnik, takornarianut umiarsuarnillu angallattunut pitsaasunik ataavartunillu niuffissalersorneqassallutik, Erik Jensen oqarpoq.

Talittarfiit assigiiaartunngortinneqarnissaat ukkatarineqarpoq, taamaalilluni aserfallatsaaliuinermi suliassat nalinginnaasunngorsarneqassallutik.

Seneste nyheder / Nutaarsiassat kingulliit