Namminersorlutik Oqartussat kulturimut nersornaasiuttagaat 2013 tunniunneqarpoq

Namminersorlutik Oqartussat maanna paasissutissiissutaat namminersorlutik oqartussat kulturimut nersornaasiuttagaat 2013 ukioq manna kikkunnut tunniunneqarnersoq.
Nersornaat tunniunneqarpoq Jørgen Kristensenimut, Qaanaami Aalisartut Piniarfullu Peqatigiiffiannut (QAPP), peqatigiiffimmullu Nuummi Aliikkusersuisartut Isiginnaartitsisartullu Peqatigiiffiannut (NAIP).
Naalakkersuisut aalajangersimapput kulturimut nersornaat tunniunneqassasoq inummut ataatsimut peqatigiiffinnullu marlunnut, kalaallit piniarnermik kulturitoqaannik, aningaasarsiutiginagu isiginnaartitsinermik kulturikkullu kingornussanik tigussaanngitsunik immikkut ittumik suliniuteqarsimasunut.
Nersornaasiinerit tallimanngormat Nuummi kulturip illorsuani Katuami ingerlanneqarput.
Jørgen Kristensen pillugu iliinniartitaanermut, kulturimut, ilageeqarnermut naligiissitaanermullu Naalakkersuisoq Nick Nielsen, Siumut, ilaatigut oqarpoq:
– Jørgen Kristensen ilisimaneqarpoq ataqqineqarlunilu qimussimik sukkaniunnermi Avannaata Qimussersuani, ukiut tamaasa Avannaani ingerlanneqartartumi, peqataasartutoqqatut. Qimusserneq qimussimillu sukkaniuttarneq eqqarsaatigalugit immikkut illuinnartumik suliniuteqartarsimavoq, ukioq mannalu rekordiliivoq Avannaata Qimussersuani tallimassaa ajugaagami.
– Immikkut maluginiagassaavoq qimmiminik isumaginnilluartarnera qimminillu pitsaasumik perorsaanissaq pingaartilluarpaa piffissami, kalaallit qimmiisa atorunnaariartorneqarfianni. Tassunga pingaaruteqarpoq nammineq qimminilu suleqatigiilluarnissartik. Suleqatigiilluarnerussaaq qimuttut aamma qimunnissaminnut kajumissuseqarluartilerlugit. Tamanna peqatigalugu piumassuseqarluartuuvoq ingerlasserusussuseqarlunilu sunngiffimmi sammisani pingaartilluarlugu, inooriaasinngortissimallugu, tamannalu pissutigalugu Kalaallit Nunaanni qimussernermi maligassiuisunngortsimalluni.
QAPP pillugu Nick Nielsen ilaatigut oqarpoq:
– Piniariaasitoqqat atorlugit Inughuit inooriaasitoqaat peqatigiiffiup attatiinnarniarsimavaa. Minnerunngitsumik qaannamik qilalugarniarnermi. Piniartut piniarnermut, ileqqutoqqanik inuiaqatigiillu uumasunik nungusaannginnissamik pingaarnerusutut soqutigisaannik tunngavilimmik malittarisassat attatiinnarniarsimavaat imminnullu malittarisassanik sakkortunerusunik eqqussisimallutik.
– Tamakkua inatsisitoqqanik tunngaveqarput, immikkullu maluginiagassaavoq kulturitoqartik attatiinnarsinnaasimammassuk piffissami, nunanit kitaamiunit sunniuteqarfiusorujussuarmi. Ulluinnarni piniartutut aalisartutullu inuunerani nungusaannginnissaq pissusissamisoortumik ilaavoq.
Kiisalu NAIP pillugu Nick Nielsen oqarpoq:
– Peqatigiiffik piumassutsimik tunngavilik kulturimik ingerlatsinermi imminut immikkut ittumik malugitittarsimavoq, nunami maani nunanilu allani. Ukiuni kingullerni sammisanik assigiinngitsunik amerlanerusunik ineriartortitsisimapput, innuttaasunit nuannarineqartunik aammalu meeqqanik inuusuttunillu akulerutsitsisunik. Pingaartumik ilisimaneqarput peqatigiiffiup qitittariaasaanik nipilersugaanillu, taakkualu ineriartortissimavaat innuttaasunit nuannarineqarluartumik. Canadami naggueqativut suleqatigalugit qanga inooriaasitoqaq inuuneq pillugu aningaasarsiutiginagu isiginnaartitsinikkut sammilertissimavaat, tamatumalu saniatigut Kalaallit Nunaata sinnerani kulturimik ingerlatsinerminnik ilisimaneqarlutik.
Sermitsiaq.AG-p assit qanittukkut piariissavai