IT-mik sillimaniarneq
Namminersorlutik Oqartussat innuttaasunut tamanut attaveqarsinnaanngoqqilerput
Namminersorlutik Oqartussat innuttaasut hotmailimi, livemailimi outlookimilu mailserverillit tamaasa attaveqarfigisinnaalerpai
Maanna Namminersorlutik Oqartussat innuttaasunut tamanut mailinik nassiussisinnaalerput. Tamanna sapaatit akornanni arlalinngortuni ajornarsimagaluarpoq Microsoftip mailserverit arlallit soorlu hotmail, livemail outlookilu mattukkaluarmagit, Digitalimik Aqutsinermi Sullissisoqarfimmi it-mi pisortaq Tony Ditlevsdal tusagassiuutinut nalunaarummi paasissutissiivoq.
- Oqiliallannaqaaq innuttaasut tamaasa mailikkut attavigisinnaaleratsigit, Digitalimik Aqutsinermi Sullissisoqarfimmi it-mi pisortaq Tony Ditlevsdal iluarusulluni oqarpoq nangillunilu:
Aamma atuaruk: Isornartorsiuineq Microsoftimit oqaaseqarfigiumaneqanngilaq
- Sapaatit akunnerni arlalissuarni ullut tamaasa akunnerpassuit atorlugit ajornartorsiutip aaqqinniarsarinera avaanngunartorsuusimavoq. Aatsaat tusagassiuutitigut innuttaasut tusarlerneqarmata Microsoftikkormiut qisuariapallapput. Tusagassiuutillu aqqutigalugit atuarpara Microsoftikkut supportiminnut anngussimasinnaannginnerput ajuusaarutigigaat.
Tony Ditlevsdal naapertorlugu Digitalimik Aqutsinermi Sullissisoqarfimmit innuttaasunut akeqanngitsumik toqqaannartumik mailitaartissinnaalernissaat maanna sulissutigaarput:
- Kingumut taamatut pisoqaqqunagu, taanna oqarpoq.
Aamma atuaruk: Namminersorlutik Oqartussani maili atorneqarsinnaanngikkallarpoq