Siorarsiorfik
Namminersorlutik Oqartsussat Sermersuumut iluarinninnginnerat Steen Lyngep paasisinnaanngilaa
Namminersorlutik Oqartussat Kommuneqarfik Sermersuumut suleqatiginnikkusussanngikkunik, pitsaasumik aningaasaqarnikkut kommunimi ineriartorneq unitsissinnaavaat, kommunalbestyrelsimi ilaasortaq Steen Lynge (A) oqarpoq.
- Aningaasaqarnermut naalakkersuisup Aqqaluaq B. Egedep aamma Naalakkersuisut siulittaasuata Kim Kielsenip suleqatiginnikkusunnermik takutitsinnginnerat Nuummi pilersaarutit itigartitsissutigiinnarmatigit alianartuuvoq.
Kommuneqarfik Sermersuumi kommunalbestyrelsimut ilaasortaq, Steen Lynge (A) oqarpoq.
Sapaatip-akunnerata aallartinnerani Kim Kielsenip Siorarsiorfimmi suliniut 'isumaannakkut pilersaarutaanerarpaa'.
Aamma atuaruk: Kielsen Nuummi suliniut pillugu: Isumaannakkut pilersaarut
Sermersooq kisimiissinnaanngilaq
Nuummi Atassutip immikkoortoqarfiata illoqarfiup immikkoortua Siorarsiorfik sanaartorfiginissaanut pilersaarut tapersersoraa, Steen Lyngep erseqqissaatigaa.
- Siunissamimi qaninnermi Nuuk sanaartorfissaarutissaa, taamaammat illoqarfimmi siunissaq qanoq isikkoqarnissaanut pilersaarusiornissamut aqqutissatuaavoq. Kommuneqarfik Sermersuup ukiuni makkunani Nuummi illoqarfiup ineriartornera kisimi aaqqiivigisinnaanngilaa. Illoqarfimmut nuuttartut amerligaluttuinnarput, tamannalu unitsnneqarsinnaanngilaq, Steen Lynge tusagassiuutinut nalunaarummi allappoq.
Aamma atuaruk: Asii Kielsenip assuarliinera pillugu: Terlersorluni saassussineq
Namminersorlutik Oqartussat ineriartorneq unitsinniarpaa
Tamatuma saniatigut ineriartorneq Namminersorlutik Oqartussat isiginngitsuusaaginnarlugu Kommuneqarfik Sermersuumik suleqatiginnikkumanngiinnarsinnaanngitsut, taanna isumaqarpoq.
- Namminersorlutik Oqartussat Kommuneqarfik Sermersooq suleqatigiumanngippagu, Namminersorlutik Oqartussat kommunimi aningaasaqarnikkut ineriartorneq pitsaasoq, inuiaqatigiinnullu siunissami iluaqutaasinnaasoq unitsissinnaavaa, Steen Lynge oqarpoq.
Aamma atuaruk: Nunatta oqaluttuarisaanerani inissianut pilersaarut annerpaaq
taamaammat illoqarfimmi ineriartortitsineq Namminersorlutik Oqartussat qanimut suleqatigalugit pisinnaasoq, Atassut Nuuk isumaqarpoq.
- Nuna tamakkerlugu aamma kommunimi politikkimik nunap kommuniisalu ineriartornerannut ataatsimut anguniagaqarnissaat pingaaruteqarpoq. Tamanna tulleriiaareqqissaarluni piviusorsiorlunilu kisimi pisinnaavoq.
- Kommunip nammineerluni anguniagaq taama angissusilik nunap sinnerani aningaasaqarneq sunninngitsoorsinnaanngilaa, Steen Lynge oqarpoq, taassuma Naalakkersuisut Kommuneqarfik Sermersuumut 'ataatsimut anguniakkanik pilersitsinani anguniakkat itigartitsissutigiinnarnagit' oqaloqatiginninnissaanik kajumissaarivoq.
Aamma atuaruk: Siorarsiorfimmik pilersaarut Siumup nuummi immikkoortortaqarfiata tapersorpaa