Gallashow
Nammineq piumassutsiminnik sulisut akissarsisitinneqassapput
Arfininngorpat peqqissutsimut naalakkersuisup Kalaallit Nunaanni timersoqatigiiffiit Kattuffiatalu inuit namminneq piumassutsiminnik timersornermut sunniuteqartut aammalu timimik aalatsitsinerulernermut sunniuteqarluarsimasut nersorniarpaat
Unnuk aaqqissuunneqarsimavoq nalliuttorsiorpalaartumik Katuami takutitsilluni ingerlanneqalerpat tamannalu KNR-TV-mit toqqaannartumik aallakaatinneqassaaq.
Peqqissutsimut naalakkersuisup nuannaarutigaa nuna tamakkerlugu timip aalatinnerunissaanut unammisitsinermi Naalakkersuisut aaqqissuussaanni peqataalluarfigineqarmat.
Suliniutit pitsaasut
Doris Jakobsen suliniutit pitsaasut tamaasa pioreersut ersersissallugit allanillu isumassarsisitsisinnaasut pingaaruteqartut isumaqarpoq.
- Ukioq manna ajugaasut maligassiuilluarput atuarfinni, suliffeqarfinni illoqarfigisamilu nunaqarfigisamiluunniit qanoq iliortoqarsinnaasoq timimik aalatsitsinerulernissamut. Assorsuaq nuannaarutigaara taamak amerlatigisut unammisitsinermut peqataaniarlutik nalunaarsimammata, peqqissutsimut naalakkersuisoq oqarpoq.
Ukioq ikiuukkumaffiusoq
Kalaallit Nunaanni Timersoqatigiiffiit Kattuffiani siulittaasup nuannaarutigaa periarfissaqarmat timersornerup iluani inunnik nersuisoqarsinnaammat minnerunngitsumillu inuit nammineq piumassutsiminni sulisut inuiaqatigiinnik kivitsisuummata.
- uannaarutigaarput namminneq piumassutsiminnik sulisut piumassuseqarluarnerat ukiumilu 2016-imi AWG2016 suleqatigalugu MIBB-lu ukioq nammineq piumassutsimut ukioritissinnaalersimammassuk, Nuka Kleemann oqarpoq.
Kalaallit Nunaanni Timersoqatigiiffiit Kattuffiata ukiut tamaasa akissarsisitsisarpoq peqqissutsimullu naalakkersuisoq timip aalatinnerulernissaanut unammisitsinermi akissarsitsisarpoq innuttaasut peqqinnerulernissaat ukioq 2019 tikillugu.