Danmarkimi angerlarsimaffeqanngitsut

Nammineq kajumissutsiminik suleqataarusuttoq angerlarsimaffeqanngitsut atugaat pitsanngorsarniarlugit sorsuuteqarniartoq

Christina Strauss siornatigut angerlarsimaffeqanngitsuusimasoq angerlarsimaffeqanngitsut atugarisaannik pitsanngorsaaniartut peqatigiiffianni SAND-mi siulittaasutut toqqarneqarpoq.

SAND-mi ataatsimeersuarnermi kalaallit peqataasut. Saamimmiit Gerth, Jens kiisalu Jensinemik atillit marluk. Jørgen tunorliuvoq.

Angerlarsimaffeqanngitsut 80-it kiisalu angerlarsimaffeqanngitsuusimasut Danmarkimi sumiiffinnit tamaginnit aggerfeqartut Odensimi soqutigisaqaqatigiit peqatigiiffiata SAND-ip aaqqissugaanik ukiumoortumik ataatsimeersuaqqammerput.

Angerlarsimaffeqanngitsuerunnissaa angerlarsimaffeqanngitsullu atugaannik pitsanngorsaanissaq SAND-mit sulissutigineqartarpoq. Naalagaaffik tamakkerlugu sumiiffiit suleqatigalugit sulisoqarpoq. SAND-mit politikerit, allaffissornikkut suliallit, angerlarsimaffeqanngitsunik angerlarsimaffeqanngitsuusimasunillu sullissisut suleqatigineqarput. Angerlarsimaffeqanngitsut angerlarsimaffeqanngitsuusimasullu minnerpaamik 150-it nammineq kajumissutsiminnik SAND-mi suleqataapput. SAND naalisagaavoq imalu oqaasertaqarluni: Sammenslutningen af Nærudvalg i Danmark.

Kinaluunniit eqqugaasinnaavoq

Ukiup ataatsip ingerlanerani piffissami sivikinnerusumi sivisunerusumiluunniit Danmarkimi inuit 15.000-it missaanniittut angerlarsimaffeqanngitsunngornissaat SAND-mit naatsorsuutigineqarpoq. Angerlarsimaffeqanngitsuuneq najugassaqannginnermuinnaq tunnganngilaq. Piffissap ilaani tamatta immitsinnut angerlarsimaffeqanngitsutut taanngikkaluarluta najugassatsinnik amigaateqalersinnaavugut. Angerlarsimaffeqanngitsut ajornartorsiutinik allanik sorsugassaqartarput. Imaassinnaavoq atornerluisuusimasut, tarnikkut napparsimasuusut, ilaqutariinni sakkortuumik misigisaqarsimasut, kiserliortut, arlaatigulluunniit anigorsinnaanngisaminnik anniaateqarlutik innarluuteqartut.

Aqqusinermi sulisut

Ataatsimeersuarnermi unillatsiartoqarnerani Sermitsiaq.AG apersuivoq, tassanilu angerlarsimaffeqanngitsunngorsimasut annertuumik ajornartorsiulersinnatik ikiorneqartartut arlalinnit oqaatigineqarpoq.

Aqqusinermi sulisut angerlarsimaffeqanngitsunik attaveqartartut angerlarsimaffeqanngitsunut pingaaruteqartutut inissisimasarput. SAND-mi inuit sulerusussuseqarluartut siornatigullu angerlarsimaffeqanngitsuusimasut annertuumik ikiuunnermikkut tunniussaqartarput. Angerlarsimaffeqanngitsuusimasummi angerlarsimaffeqanngitsut qanoq misiginerannik ilisimaarinnilluartarput. SAND-mi siulittaasuusimasoq Steen Rosenquist oqalugiarami tulluusimaaqaluni ima oqarpoq:

- Sanngiinnerpaat aamma peqataatittalerpagut.

Suleqatigiit assigiinngitsut

Kalaallit angerlarsimaffeqanngitsut angerlarsimaffeqanngitsuusimasullu ajornartorsiutaannik aaqqiiniartunik suleqatigiinnik assigiinngitsunik SAND pilersitsisimavoq. Gert Gedionsenip, kalaallinit kingoqqisuusup Nuummi angerlarsimaffeqanngitsut oqaloqatigineqartartut oqaluttuaraa.

- Taamaalluta Nuummukarnissarput sinnattutta annersaraat, Gerth Gedionsen oqarpoq.

Siulittaasoq nutaaq Kalaallit Nunaannut attuumassutilik

Christina Strauss Aarhusimeersuuvoq, siornatigullu angerlarsimaffeqanngitsuusimalluni, taannalu Odensimi ataatsimeersuartoqarnerani ukiumi aggersumi SAND-mi siulittaasutut toqqagaavoq.

- Kalaallimik anaanassaqarnikuuvunga Aarhusimilu kalaallinut akuujuaannarnikuullunga, taamaattorlu maanna aamma suliassat kalaallinut angerlarsimaffeqanngitsunut angerlarsimaffeqanngitsuusimasunullu tunngasut suliarinissaannut piareersimalluartutut misigisimallunga, Christina Strauss oqarpoq nangillunilu:

- Danmarkimi angerlarsimaffeqanngitsut qanoq amerlatiginersut oqaatigiuminaappoq. Aamma kalaallit angerlarsimaffeqanngitsut qassioqqissaarnersut oqaatigiuminaalluni. Angerlarsimaffeqanngitsut tulluarsarsimasut kisitsisinut ilaanngitsut amerlasimassapput. Angerlarsimaffeqanngitsut tulluarsarsimasut tassaapput peqquteqavillutik inimi mikisumiinnissaminnik sungiussisinnaanngitsut, taamaasillutillu allanik ilaqarniarlutik arlaannukaqattaartartut, Christina Strauss naggasiivoq.

Powered by Labrador CMS