Naluttarfimmi siulersuisut atorunnaarsinneqarput

Inuit ataasiakkaat oqartussaaqataanerannik aamma sunniuteqaqataasinnaanerannik nakussassaanissaq Kommuneqarfik Sermersuumit kissaatigineqarpoq.

Taamaattumik taluttarfimmi siulersuisut atorunnaarsinneqarput.

Kommunip nittartakkamini tamanna allappaa.

Tamanut iluaqutaasussaq
Atuisut siunnersuisoqatigiivisa siunissami siunnersuisutut sammisat atuisunut tunngassuteqavissut suliarisassavaat, tassaasinnaallutik billitsit akii, ammasarfiit aamma nalunnguarfinnik agguataarineq.

Naluttarfimmik ingerlatsinermut atatillugu atuisut siunnersuisoqatigiivi atuisut assigiinngitsut kissaataat pisariaqartitallu pillugit siunnersuisutut aamma atuutissapput. Taakkua saniatigut atuisut siunnersuisoqatigiivisa naluttarfiup aqutsisui kommunilu aningaasaliissutit iluanni pingaarnersiuineq aallaavigalugu siunnersuinermik ingerlatsiffigissavai.

- Naluttarfik Malimmi siulersuisut atuisut siunnersuisoqatigiivinik taarserneqarnissaanik aalajangiussineq nuannaarutigaarput. Naluttarfimmut iluaqutaassaaq inunnik ulluinnarni Malimmik ingerlatsinermik ineriartortitsinermillu qanimut peqataasunik atuisartut siunnersuisoqatigiivi tunngavissalimmik ilaasortaqassammat, Meeqqanut, Ilaqutariinnut Atuarfeqarnermullu Ataatsimiititamut siulittaasoq, Poul Hansen (D) oqarpoq.

Tallimanik ilaasortaqassaaq
Atuisut siunnersuisoqatigiivi nutaat tallimanik ilaasortaqassaapput. Ilaasortat marluk Nuummi Naluttartut Klubbiat – Nuuk Svømmeklub, ilaasortat illoqarfimmiut atuisut allat marluk ilaasortarlu ataaseq Meeqqanut, Ilaqutariinnut Atuarfeqarnermullu Ingerlatsivimmit innersuunneqartoq.

Ilaasortaq kingullertut taaneqartoq atuarfiit, meeqqeriviit meeraaqqeriviillu sinniisorissavaat. Naluttarfimmi atuisut siunnersuisoqatigiivi ukiuni marlunni ilaasortaasassapput nikingasumik ilaasortaaffissalerlugit qinerneqartassallutik.