Issittoq
Nalunaarusiat: Issittoq ima nakkutigineqassaaq
Kalaallit Nunaat siunissami qanoq nakkutigineqarsinnaanersoq DTU Spacemit Illersornissamut ministeriaqarfimmiillu misissorneqaleruttorpoq. Qaammataasat atorlugit nakkutiginninnissaq tamanit siunnersuutigineqarpoq
Dronet? Qaammataasat? Qimussit? Immaqaluunniit tamakku akulerullugit?
Kalaallit Nunaat siunissami qanoq nakkutigineqassanersoq pillugu apeqquterpassuit takkussuutilerput, Issittormi soqutigineqariartuinnavippoq.
Kalaallit Nunaata avannarpasissortaa Danmarkip kunngeqarfianit qanoq nakkutigineqassanersoq suli annertunerusumik paasiniaaffigineqartariaqarnera oqaatigineqarpoq. Tassanimi inuinnaat kiisalu sakkutuut Issittumiittut pitsaanerusumik nakkutigineqartariaqarput.
Taamaattumik nakkutilliineq siunissami qanoq isikkoqarnissaa DTU Space nalunaarusiorpoq, tassani qaammataasat dronellu atorneqarnissaat siunnersuutigineqarpoq. Kalaallit Nunaata nunataata assiliartalersornissaanut attaveqaqatigiinnerit sumiissusersiutit Issittumi atorneqassasut siunnersuutigineqarpoq, tamanna JyllandsPostenimi atuarneqarsinnaavoq.
Illersornissamut ministeriaqarfik aamma assingusumik nalunaarusiamik suliaqalerpoq.
Qaammataasat dronellu
Qaammataasat atorneqarnissaat tamanit soqutigineqarpoq. DTU Spacemi siunnersortaasup Jens Olaf Pepke Pedersenip aamma siunnersuutigaa dronet atorneqartalissasut.
- Illersornissamut atortorissaarutit pisariaqartinneqartut tassaapput inuinnaat aamma atorfissaqartitaat. Sumiiffiit ilaanni dronet atornissaat pisariaqarpoq, annaassiniarnerni tamakku atorneqarsinnaapput qulimiguulinnik aallartitsinissaq navianassappat. Aamma dronemik annaasaqarneq pitsaanerussaaq inuttanit annaasaqarnermit, Jens Olaf Pepke Pedersen Jyllands-Postenimut nassuiaavoq.
Nalunaarusiaq 'Synergipotentialet i satellitbaserede systemer og droner i Arktis' qulimiguullit atornagit dronenik taarsiullugit atorneqarsinnaaneri allaaserineqarpoq.
Dronet aamma nunap assinganik assiliornermi ujaasinernilu atorneqarsinnaavoq.