Nalunaarusiaq: Kinap Kalaallit Nunaanni pilersaarutai toqqortaanngillat
Kinap Kalaallit Nunaannut soqutiginninnera imaatigut angallannermut aamma aatsitassanut tunngassuteqarpoq, nalunaarusiami nutaami tamanna nalilerneqarpoq.
Kinamiunuku Kalaallit Nunaanni piviusumik suniartut? Kinamiut suliffeqarfiit aatsitassarsiornermik suliniutinut, Kangilinnguanut, mittarfinnut imaluunniit ilisimatusarnikkut suliniutinik pilersitsiniaraangata apeqqutit tamakku annerusumik minnerusumilluunniit apeqqutigineqarajuttarput.
Kinamiut tungaannit Issittumi aamma ‘polar silkevejimik’ pilersitsinissamik soqutiginninnermik pisortatigoortumik nalunaaruteqartoqarnerata kingorna, apeqqut nipituuliorluni apeqqutigineqarnerulerpoq. Kisianni toqqorteraluni pilersaaruteqartoqanngilaq, Dansk Institut for Internationale Studier nalunaarusiami nutaami taama naliliivoq.
- Kinap Issittumi siunertai toqqorterneqanngillat, nalunaarusiami ilisimatuup DIIS-imeersup, Yang Jiangimit suliarineqartumi tamanna allaqqavoq.
Suliffeqarfiit naalakkersuisut ikinngutiginiartaraat
Kinamiut suliffeqarfii naalagaaffimmit imaluunniit namminersortuugunik, pisortatigoortumik politikkiat naapertorlugu ikinngutiginninniarsaralutik piuaannartussaapput.
- Kinami aatsitassarsiornermik ingerlatsinermut, sanaartornermut aamma imaatigut angallannermut tunngatillugu naalakkersuisunik ikinngutiginnitsinnani ingerlatsineq ajornakusoorsinnaammat tamanna pisarpoq. Kinamiullu suliffeqarfiit nunani allani aningaasaliigaangamik, Kinamiut naalagaaffiata aningaaserivianit aningaasaliiffigineqarnissartik neriuutigisaramikku, nalunaarusiami tamanna allaqqavoq.
Suliffeqarfiup namminersortup General Nice ikiorsiullugu Yang Jiangip tamanna takusassiaraa, suliffeqarfik taanna Isuani saviminissanut suliniummut aningaasaliinikuuvoq - kiisalu Kangilinnguit pisiariniaraluarnikuullugit. Naak saviminissanut suliniut uninngagaluartoq, General Nice naalakkersuisunut pitsaasumik atassuteqarnertik iluaqutigaat. Ilaatigut najukkami suliffeqarfiit naalagaaffimmit pigineqartut General Nicemi piginneqataassutsitik annertusinikuuaat.
Kinap Issittumut politikkianut naleqquttoq
Kinap Issittoq pillugu politikkini pisortatigoortumik januaarimi tulutuunngorlugu allakkami nalunaarutigaa, allagaq avammut sammitinneqartoq. Kinamiut suliffeqarfiisa Kalaallit Nunaanni periusaat misissoraanni, taava politikkimut nalunaarutigineqartumut tulluartorujussuuvoq.
- Kinamiut suliffeqarfiisa Kalaallit Nunaata nunataani pisuussutinut aamma attaveqaqatigiinnermut soqutiginninnerat naalakkersuisut politikkiannut pappilissami allakkamiittumut naapertuupput. Suliffeqarfiillu siunissami suli attaveqarnerusumik aamma kinamiut naalakkersuisuinit aningaasanik tapiiffigineqarnerusalissapput, Issittumut politikki iluaqutigalugu.
Kinap Issittumut politikkimini ‘issittumut qanittutut’ naalagaaffittut imaatigut angallannermut, aalisarnermut, timmisartut qulaannerinut aamma sumiiffimmi ilisimatusarnermut imminut nassuiarpoq.