aatsitassarsiorneq
Nalunaarusiaq: Kalaallit Nunaat millionilikkaanik amigaateqassaaq
Nunarput inuussutissarsiornikkut amerlasuunik periarfissaqarpoq uuliasiunngikkaluaraanniluunniit, Rambøllip Greenpeacellu nalunaarusiaanni ilaatigut atuarneqarsinnaavoq
Naalagaaffiup tapiissutaat nunatsinnut 2009-mili ukiumut 3,6 milliardinik tunniussisarput, kisitsillu ukiuni tulliuttuni allannguuteqartinnagu inissinneqarnikuulluni. Aningaasalli ukiut qulit qaangiuppata utoqqarnut meeqqallu atuarfiinut tapiisarnerit naammakkunnaassapput, taamaammallu iliuuseqartoqartariaqarpoq.
Ukiummi qulit qaangiuppata isertitarineqartartut aningaasartuutillu ukiumut 600 millioniulersimassapput, siunersorteqarfik Rambøll Greenpeacemut nalunaarusiaani ilaatigut atuarneqarsinnaavoq.
Nalunaarusiami ilaatigut ilanngunneqarpoq qanoq aalisarnikkut, takornariaqarnikkut aatsitassarsiornikkullu pitsaanerusumik nunatta aningaasaqarneranut iluaqutaalersinnaanersut.
- Aatsitassarsiornermut uuliasiornermullu isornartorsiuisuugaanni Kalaallit Nunaata ineriartornissaanut kinguarsaasutut isigineqalertarput, Greenpeacep Issittoq pillugu akisussaasua Jon Burgwald Ritzau-imut oqarpoq.
- Nalunaarusiortitsinitsinni oqallittoqarnissaa kissaatigaarput, inuiaqatigiimmi aningaasaqarnikkut siuariartornissamut periarfissaqarluarpoq suliffissanullu aamma nutaanik pilersitsisoqarsinnaavoq nungusaataanngitsumik iliortoqaraluartoq, oqarpoq.
Nutaanik iliuuseqartoqarsinnaanera nalunaarusiap takutinniarpaa. Rambøllip nalunaarusiaa nalunaarusiamut saqqummeqqammersumut 'Kalaallit Nunaannut iluaqutissat'-nut assinguvoq.
- Naak uuliasiortoqanngikkaluartoq allanik aningaasarsiorfiusinnaasunik peqarluartoq misissuinitsinni paasivarput. Soorlu aalisarneq eqqaassagaanni periarfissarpassuaqarpoq, aalisakkammi nutaat suli aalisarneqarneq ajorput, Henrik Rosenberg Seiding Rambøll Management Consultingimi pisortaq oqarpoq.
Takornarialerineq, aatsitassarsiorneq, nukissiorneq aqqutigalugu suliffissuarnik aallartitsineq kiisalu narsaateqarneq piniarnerlu ineriartortitsiffigineqarsinnaasut ilaatigut nalunaarusiaanni takuneqarsinnaavoq. Politikkikkulli iliuuseqartoqarnissaa pisariaqartinneqartoq oqaatigineqarpoq. Avatangiisinut silallu pissusaanut Greenpeace suli qanimut malinnaassaaq.
- Aatsitassarsiornerit navianarsinnaasut nipaaffiginavianngilagut, uuliasiortoqarnissaanullu suli isornartorsiuissaagut, Kalaallit Nunaalli aamma uninngaannarnissaa kissaatiginngilarput, Jon Burgwald oqarpoq.
Katuami ullumi oqallinneq
Greenpeace Rambøll-ilu innuttaasunik aggersaavoq ullumi tallimanngornermi, tassani Katuami Nuummi nalunaarusiaq pillugu oqallittoqassalluni. Oqallinneq nalunaaqutaq 16.30-mit 18.00-ip tungaanut ingerlanneqassaaq. Oqallinnermi sammineqassaaq qanoq inuussutissarsiornermik ingerlataqartut siuarsaaffigineqarsinnaanersut 2025-ip tungaanut, tassanilu peqataassapput Vittus Qujaukitsoq Siumut, Naaja Nathanielsen IA kiisalu Knud Kristiansen Atassut.
Nalunaarusiaq 'Nunatsinnut iluaqutissat' pillugit allaaserisat takukkit