Nalunaarusiaq isertuussaq Naajap apeqqutigaa

Uranimik piiaasoqassappat (Kuannersuarni, aaqqiss.) taava killiliisoqassava piiaaffik najugaqarfinnut qanoq qanitsigisumiissanersoq.
Taamatut ilaatigut Naalakkersuisunut apeqquteqarpoq IA-p aatsitassanut oqaaseqartartua Naaja Nathanielsen, immikkullu ittumik apeqqutigalugu uranimut akuersaannginnerup atorunnaarsinneqarneratigut isumannaatsuunermut politikki pillugu kalaallit qallunaallu suleqatigiissitaliaata nalunaarusiaata isertuussap imarisaa inerniliineraluunniit.
Aamma atuaruk: Uranimut akuersaannginneq ukiaru atorunnaarsinneqassaaq
Ilanngullugu Naaja Nathanielsenip Naalakkersuisunut oqaatigeqquvaa uranimut akuersaannginnerup atorunnaarsinneqarneranut atatillugu isumannaatsuunikkut politikkip Danmarkip Kalaallillu Nunaata akornanni avinneqarsimanera.
– Aaqqiagiinngitsoqassappallu Kalaallit Nunaanni aatsitassanik radiop qinngorneranik ulorianartunik akulinnik piiaanissaq Danmarkip pinngitsoortissinnaavaa? Pisortat ingerlatsivii nutaat suut selskabilluunniit suut siumut isigisumik atorfissaqartinneqassappat aatsitassanik radiop qinngorneranik ulorianartunik akulinnik piiaanermi tunisassianillu tuniniaaqqinnermi nakkutilliineq qulakkeerniarlugu. Pissutsit suut atuutissappat aatsitassat radiop qinngorneranik ulorianartunik akullit piiarneqartut Kalaallit Nunaata nammineq pigerusuppagit, piiaaffiup namminersortup tunisassiai pineqaraluarpataluunniit, Naaja Nathanielsen aperivoq.
– Naalakkersuisut arlaleriaqalutik nalunaarusiaq ineriigaq Inatsisartut kissaatigisaattut tamanut saqqummiukkusunneq ajorpaat. Nalunaarusiaq ineriigaq takuneqarsinnaanngimmat taarsiullugu Naalakkersuisut qinnuigissavakka immikkoortunut Inatsisartuusimasut pingaartitaannut isummeqqullugit. Ilanngullugulu innersuussutigaa Inuussutissarsiornermut Ataatsimiititaliap isumaliutissiissutaanit issuagaq:
– Ataatsimiititaliap naggataatigut oqaatigissavaa aatsitassanik uranilinnik piiaanissamik siunissami qanorluunniit aalajangiisoqaraluarpat tamanna pisariaqartoq piviusorsiortumik qulaajarneqarluartumillu tunngavilimmik oqallinnissamullu pisariaqartumik piffissaliilluni, Inatsisartuni aalajangiisartut innuttaasullu akornanni.