atornerluineq

Nalunaarusiap nutaap takutippaa Nunatsinni pitsanngoriaateqarpianngitsoq

Danmarkimi Statens Institut for Folkesundhed Kalaallit Nunaanni innuttaasut peqqissusaannik misissuinikuuvoq

Kalaallit inuusuttortaasa pingajorarterutingajaat 18-iliitinnatik kinguaassiutitigut kanngutsaatsuliorfigineqarnikuupput. Kalaallit tamarmik tallimararterutaasa missaaniittut imminut toqunnissartik eqqarsaatiginikuuaat.

Kisitsisit Statens Institut for Folkesundhedip misissuineranit nutaaminngaanneerput, taakkulu takutippaat assigiinngitsuni siuariartoqarsimannngitsoq imaluunniit ukiuni qulini kingullerni annikitsuinnarmik siariartoqarsimasoq, dr.dk allappoq.

Atuaruk: Imigassamik toqquteqartartut ukiuni kingullerni qulini 130-iupput

Imigassamik atornerluineq
Nalunaarusiap aamma takutippaa, angajoqqaat 18-t inorlugit ukiulinnik meeraqartut tallimararterutinit amerlanerusut, ajoqutaasinnaasumik imigassamik atornerluisuusut.

Tassami 2005-imi angajoqqaat 18-t inorlugit ukiulinnik meeraqartut 25,5 procentii imigassamik ajoqutaasinnaasumik atornerluisuupput. 2014-imi tamanna 21,5 procentiupput.

Atuaruk: Meeqqanut atugarliortunut ikiuineq

Kisitsisit ernumanartut
- Angerlarsimaffimmi imigassamik ajornartorsiorfiusumi peroriartorneq, inuit imminut toqunnissamik eqqarsaateqarnerusarnerannut pisooqataasut ilagisarpaat, Christina Viskum Lytken Larsen oqarpoq.

- Ksitsisit 2014-imeersut naapertorlugit 18-29-inik ukiullit 32,8 procentii kinguaassiutitigut kanngutsaatsuliorfigineqarnikuupput. 2005-imi kisitsisit taakku assigaat. Tamanna ernumanarpoq, Christina Viskum Lytken Larsen oqarpoq.

Taanna Statens Institut for Folkesundhedimi ilisimatusartuuvoq, nalunaarusiamilu suliarinnittut ilagaat.

Atuaruk: Nutaamik eqqarsartariaaseqarnissaq Meeqqat Illersuisuata ujartorpaa

- Kisitsisit taakku annertoorujussuupput, annikilliartunnginnerallu ernumanarpoq. Ajornartorsiut ukkatarineqartorujussuugaluarpoq, kisiannili inuusuttut qiviaraanni allanngoriartortoqarnngilaq, taanna dr.dk-mut oqarpoq.

Taassuma oqaatigaa, appariaat taanna annikitsoq ineriartornermut pitsaaasumut takussutissaasinnaasoq, kisiannili oqaaseqarfigissallugu siusippallaartoq.

Powered by Labrador CMS