Inatsisartut
Nalunaaquttap akunnerani apeqqarissaarnermi Kim qitiusoq
Partiinut tapiissutip Naalakkersuisut siulittaasuata qanoq isumaqarfigineraa pillugu apeqqut Naalakkersuisullu Kangerlussuarmiit Sisimiunut aqqusinniornissaq taperserneraat iluamik akissuteqarfigineqanngillat
Sapaatip-akunneranut pisartumi nalunaaquttap akunnerani apeqqarissaanermi, Naalakkersuisut siulittaasuat Kim Kielsen (S) pingasunngornermi apeqqarissaarfigineqarpoq.
Nalunaaquttallu akunnerata ingerlanera, Kim Kielsen arlalinnik apeqquteqarfigineqarpoq.
Partiinut tapiissut pillugu, Naalakkersuisullu Kangerlussuarmiit Sisimiunut aqqusinniornissaq taperserneraat, siulittaasuunermilu nalaani suna angusamini kusanarnerpaatut isigineraa pillugit Kim Kielsen ilaatigut aperineqarpoq.
Akissutit ersarinngitsut
Kim Kielsenip apeqquteqartut ilaat iluamik akissuteqarfiginangit pakatsisikkunarpai.
- Inatsisartut partiinut tapiissut pillugu siunnersuutaat tapersiinnarsinnaavara, Rand Vestergaard Evaldsenip inatsissatut siunnersuut qanoq isumaqarfigineraa pillugu apeqquteqaata amerlanerussuteqartunit taperserneqartoq, taama akissuteqarfigaa.
Maleruaqqusat malinneqassasut
Naalakkersuisulli Kangerlussuarmiit Sisimiunut aqqusinniornissat taperserneraat pillugu apeqqut iluamik akissuteqarfigineqanngilaq:
- Uagut, Naalakkersuisut nunamik siuarsaarusuttunut aporfilersuissanngilagut. Kisianni maleruaqqusat malissavagut. Ingerlariaqqitsingata nalilersueqqaartariaqarpuvut, Kim Kielsen Henrik Fleischerip (PN) apeqquteqaataanut akivoq.
Nivi Olsenip (D) Naalakkersuisut siulittaasuattut sulinermini suna angusani kusanarnerpaanersoq apeqqutaa pillugu Kim Kielsen akissuteqarpoq:
- Angusarisimasakka nammineq nalilersorusunngilakka. Inuiaqatigiit ineriartornera pingaarnerutippara. Partiit apeqqutit artornartut pillugit suleqatigiissinnaanera nunami pingaarnersaavoq, oqaaseqartarfimmit akissutigineqarpoq.