IA-mi siulittaasoq nutaaq
Naliliisartoq: Siulittaasortaarneq IAp iluaqutigisinnaavaa
Inuit Ataqatigiit siulittaasuata Kuupik Kleistip taartissaa imaannaanngitsumik suliassaqarpoq
- Qinigaaffimmi kingullermi Inuit Ataqatigiit teknologimit aqunneqarpallaarsimapput tamannalu akisunaarsimavaat.
Taama naliliisoq tassaavoq politikkikkut naliliisartoq Sten Lund Kuupik Kleistip Inuit Ataqatigiinni siulittaasutut tunuarnera pillugu oqaaseqartinneqarluni. Inatsisartuni ilaasortaq Aqqaluaq B. Egede siulittaasuugallartussanngorpoq partiip immikkut ittumik majip 30-ani ataatsimeersuarnissaata tungaanut.
Atuaruk: Taamaammat siulittaasutut tunuarpunga
Aqqaluaq B. Egede, Inatsisartuni ilaasortaq Juliane Henningsen aamma Folketingimi Inatsisartunilu ilaasortaq Sara Olsvig siulittaasussarsiornermi sassaratarsinnaanertik ilisimatitsissutigaat.
Attaveqarneq pitsaanerusoq
- Qinigaaffimmi kingullermi inuit ulluinnarni atugaat Inuit Ataqatigiit eqqumaffiginngippallaarsimavaat. Qinersisartut pingaartittarujussuuaat ulluinnarni atukkatik soorlu aningaasaqarniarnermut tunngasut. Inuit Ataqatigiit teknologimit aqunneqarpallaalernikuupput. Taamaammat siulittaasup allanngornera iluaqutaasinnavoq. Siulersuisunngortussat pingaartumik suliassarilerpaat qinersisartunut attaveqarnerup pitsaanerulernissaa, Sten Lund Sermitsiaq.AG-mut oqarpoq.
Aqqaluaq B. Egede, Juliane Henningsen aamma Sara Olsvig ulluinnarni oqallinnermi tusarsaasuupput. Partiimilli siuarsaaneq oqalliseqataanerinnarmiinngilaq.
- Oqallittuni nipituuliorneq qinersisartut tapersersuinerulernerannik kinguneqartuaannanngilaq. Qinersisartut paasineqartutut misigisimatillugit oqalunneq ilikkagassaavoq. Aamma inuiaqatigiinni pissutsinik tamakkiisumik isiginnissinnaaneq pingaarutilerujussuuvoq, Sten Lund oqarpoq.
Taassumali aamma Kuupik Kleist 2009-miit 2013-mut Naalakkersuisuni siulittaasuusoq nersualaarpaa.
- Aningaasarsiornikkut pissutsinik tamakkiisumik paasinnissinnaassueqarluartuuvoq. Taama sukumiisumik suleriaaseqartoq. Tamakkuupput Kuupik Kleistip politikkerisut nukittoqqutaasa ilaat, Sten Lund oqarpoq.