Naliliineq: USA mittarfinnut sumi aningaasaliiniarpa?
Kangerlussuaq imaluunniit Ilulissat amerikamiut illersornissaqarfiata aningaasaliinissaanut periarfissat qanipput
Amerikamiut illersornissaqarfia Nunatsinni mittarfeqarnermut aninigaasaliinissamut piareersimasut, amerikamiut Københavnimi aallartitaqarfiata Facebookikkut Twitterikkullu ataasinngormat kingullermi nalunaaruteqarmata tupaallaatigineqarpoq. Qanoq pilersaarnermik nalunaarut, tamatuminnga naqissusiisoq, amerikamiut illersornissamut ministeriata tullersortaata John Roodip ullup siuliani Pituffimmi tikeraarnermini atsiorsimavaa.
Naak saqqummiunneqarnera naatsorsuutigineqarpasinngikkaluartoq, amerikamiut illersornissaqarfiata taamatut suliniuteqarnini pillugu suliaq, danskit kalaallillu oqartussat oqaloqatigeqqaartinnagit pisinnaanngilaq. Danskit nunanut allanut ministeriaqarfia akunneq ataatsip ingerlanerata imssaani saqqummiunneqarnerata kingorna danskit/kalaallit ataatsimut tusagassiuutinut nalunaaruteqarnerata ilimanarsisippaa, amerikamiut kalaallit mittarfiini aningaasaliinissamut isumaliutaannik paasitinneqarsimasut.
Kiffartuussinermut isumaqatigiissummut attuumassuteqartoq?
Amerikamiut sakkutooqarnerannut tunngasut Permanent Committeemi oqaloqatigiissutigineqartarput, taakku ukiumut pingasoriarlutik ataatsimiittarput, kingullermik aggustimi pivoq.
IA-mi Folketingimut ilaasortap Aaja Chemnitz Larsenip isumasioqatigiinnermi matoqqasumi, amerikamiut pilersaarutaat pillugit, nunanut allanut ministeri tunngasunut Anders Samuelsen apeqquteqarfigaa.
- Amerikamiut qanoq pilersaarnermik nalunaaruteqarnerisa aamma Pituffimmi kiffartuussinissamut isumaqatigiissutit pillugit oqaloqatigiinnerit ingerlaqqittut imminnut attuumassuteqarnersut paasissallugu soqutiginartippara, taanna Sermitsiaq.AG-mut oqarpoq.
Amerikamiut Pituffimmiinnerat kalaallit inuiaqatigiit iluaqutigissagaat, Naalakkersuisut aamma Inatsisartut arlaleriarlutik oqaatigisareerpaat. Tamatumunnga atatillugu qanoq pilersaarnermut nalunaarummi aningaasaliissutit Nunatsinni innuttaasunut iluaqutaanissaa allaqqasoq maluginiagassaavoq.
Kangerlussuaq ajornartoornermi mittarfittut atorneqassaaq
Isumasioqatigiinneq matoqqasuummat, Aaja Chemnitz Larsenip (IA), nunanut allanut ministerip akissutaa issuarsinnaanngilaa. Kisianni qanoq apeqquteqarsimanerluni oqaatigisinnaavaa.
Apeqqutigineqartullu soqutiginartut ilagaa, amerikamiut illersornissaqarfiata sumi aniningaasaliinissani isumaliutersuutigineraa.
- Illoqarfiit nunaqarfiilluunniit sorliit amerikamiut aningaasaliiffiginiarneraat apeqqutigaara, Aaja Chemnitz Larsen (IA) nassuiaavoq.
Amerikamiut illersornissaqarfiata ullumikkut Kangerlussuaq ajornartoornermi mittarfissatut atorsinnaatitaavaat. Taamatuttaaq ‘ajornertoornermi, akerleriissuteqartoqarnerani imaluunniit sakkutuut sungiusarnerannut’ atatillugu mittarfik atorsinnaavaat. Tamanna Kangerlussuup aamma Kulusumi mittarfiup Namminersornerullutik Oqartussanut tunniunneqarnerannut isumaqatigiissummi tamanna atuarneqarsinnaavoq. Kangerlussuarmi mittarfik annertuumik millisinneqassappat imaluunniit qulimiguulinnut mittarfinngortinneqassappat, USA-p periarfissaq tamanna annaassavaa.
Qanoq pilersaarnermut nalunaarummi mittarfinnut aningaasaliinerit sakkutuujunngitsunut sakkutuunullu atorneqartarnissaat siunertarineqarnerarmat, tamanna siunertaassaaq.
Kangerlussuaq imaluunniit Ilulissat
Sermitsiaq.AG-p paasissutissaataat naapertorlugit, amerikamiut illersornissaqarfiat, Kangerlussuup ullumikkut atorneqarneratut ittumik atorneqarsinnaassappat, mittarfimmik 2200 meterinit takinerusumik pisariaqartitsivoq. Paasissutissarli tamanna amerikamiut tungaannit suli uppernarsarneqanngilaq.
Taamaalilluni Nuummi mittarfimmut takinerusumut inissaqanngitsumi maanna inissisimaffissaa aalajangiusimaneqarpat, tassani ilaasinnaanngilaq.
Tamanna marlunnik ilimanaateqalersitsivoq: Tassa Kangerlussuup ammatinneqarnissaanut USA akiliissaaq. Imaluunniit Ilulissani mittarfiup 2200 meterinik takinerunissaanut akiliisoqassaaq.
- Aammattaa amerikamiut mittarfinnik atuinerat amerikamiut piffimmiititaqartuarnissaannik kinguneqassanersoq apeqqutigaara, Aaja Chemnitz Larsen oqarpoq.
- Issittoq akerleriiffiunnginnissaa pingaaruteqarpoq, taamaattumillu aamma amerikamiut sakkutuuisa Nunatsinniinnerulernissaasa pingaassusaat pillugu oqallinnissaq pingaaruteqarpoq.
Inatsisartut nunanut allanut aamma isumannaatsuunissaq pillugu politikkimut ataatsimiititaa ullumi Naalakkersuisut siulittaasuat, Kim Kielsen (S), aamma nunanut allanut tunngasunut naalakkersuisoq, Vivian Motzfeldt (S) matoqqasumik isumasioqatiginissaanut qaaqqusivoq.