Naliliineq: Mútep unammilligassai
Múte B. Egede Inuit Ataqatigiinni siulittaasunngussaguni, sunik anguniagaqarnerminik ersarinnerusariaqarpoq.
Múte Bourup Egede Inuit Ataqatigiit decembarip aallaqqaataani immikkut ittumik ataatsimeersuarpata, siulittaasunngortussatut piukkunneqarpoq.
Aqqaluaq B. Egede siulittaasussatut sassarniarani nalunaarmat, taamatullu Múte Bourup Egede piukkunnartutut tikkuarmagu, takujuminaappoq kiap allap unammillersinnaassaneraa. Partiimi ilisarnartut arlallit sassarniaratik nalunaareerput, arlallillu ukiuni kingullerni politikkimik suliaqarunnaarsimallutik.
Siulittaasutut inissaq
Inuit Ataqatigiilli siulittaasuannik nutaamik taasinissamut unammillernartoq siulleq naammattooreerparput: Siulittaasussatut piukkunnarsinnaasut amerlagisassanngillat.
Múte Bourup Egede Aqqaluaq B. Egedep saniatigut partiimi misilittagalinnit arlalinnit taperserneqarnissani naatsorsuutigisinnaavaa. Imaanngilarli sassartussatut pitsaanerpaatut isigineqarami, kisiannili Sara Olsvigip tunuarneranit pikkorlunnerpaajunngitsutut inissisimagami.
Múte Bourup Egede nunatsinni partiit annersaata tulliani, partiitullu annerpaatut inissikkumasumi, siulittaasutut ingerlalluassaguni, pikkorlunnginnerpaatut nalilerneqarsinnaanini qimaamisariaqassavaa.
Siunnerfiit ersarissut
Partiip siunnerfianik ersarissaalluarnissaa tassani pisariaqarluinnarpoq – partiip imarisaa, aaqqissuussaanera pilersaarusiorsinnaaneralu uani pineqarlutik. Taamaattoqassappat iliuuseqarsinnaanermik aalajangersinnaanermillu maannamit ersarinnerusumik Múte takutitsisariaqassaaq.
Múte Bourup Egedemi sunik anguniagaqarpa? Aap, oqallorippoq, silassorilluni oqaloqatikkuminarlunilu. Tatiginnilersitsisarpoq qungujulaartuullunilu, piaartumilli politikkikkut anguniakkanik ersarissaalluarnissaq pisariaqartilertussaassavaa, nunaqarfiimmi illoqarfiillu, avannaa kujataalu pillugit partiip iluani assortuuttoqarpoq.
Sisoorneq unitsinneqartariaqartoq
Partiip imarisaa eqqarsaatigalugu, innuttaasunut IA naleqquttunngorteqqittariaqassavaa. 2009-mi qinersinermi IA ajorsarujussuaramili, qinersinerit kinguliini tapersersortikilliartorusaartuarpoq. 2009-mi qinersinermi partii qinersisut 43,7 procentiinit taaneqarpoq, upernaarlu qinersisoqarmat partiimik qinersisut 25,5 procentiullutik. Sisoorusaarneq taanna unitsittariaqassavaa ilorraallu tungaanut saatsittariaqassallugu. Taasinernimmi ikinnerusunik kina annaasakinnerunersoq, Siumumut unammillernissaq anguniagassatut tulluartuunngilaq.
IA-p qinersinermi kingullermi ajornartorsiutigaa innuttaasut ulluinnarni unammillernartitaat pingaaruteqartutut isigalugit ersarissumik oqariartuutigisinnaasimannginnamigit. Oqariartuut taanna ersarissumik oqaatiginissaa Siumup pikkoriffiginerulluinnarpaa. Tamassuma saniatigut IA-mut qinersisartut arlallit qinersinermi kingullermi Demokraatimik taasisimapput.
Tatiginassuseq
Maanna pingaaruteqarluinnalerpoq IA siuttunngorpat Biiniamut, Sakiumut, Aviâjamut Nukamullu ersarilluinnartumik oqariartuuteqarsinnaanissaq, taakku meeraasaalu inuunerat qanoq pitsaanerulissanersoq. Oqariartuuteqarnerlu ima ersaritsigisariaqarpoq, allaat tatiginarluinnarluni nunami tamarmi atuarfiit pitsaanerulissasut, inuussutissarsiornermi ineriartortoqassasoq, peqqinnissaqarfik pitsaanerulissasoq siunissarlu ajunnginnerulissasoq upperineqarsinnaasariaqarluni. Sermitsiaq.AG-mi ullumi apersuinermut sanilliutissagutsigu, suli ersarinnerusumik oqariartuuteqartariaqassaaq, tatiginarnerusumik oqariartorsinnaajumaguni.
Politikkikkut siuttuunissamik periarfissaqarneq pillugu oqalunneq eqqarsaatigissagaanni, siulittaasutut sassartoq ersarlussinnaasumik nalunaaruteqarpoq.
IA-mi politikerit nuimanerusut pingasut, Ane Hansen, Aaja Chemnitz Larsen aamma Asii Chemnitz Narup, siulittaasussatut sassartussaq Naalakkersuisut siulittaasussaattut sassartussaassasoq naatsorsuutigalugu allaatigisaminni oqariartuutigereerpaat. Taama kissaateqartoqarnera siulittaasunngorumasup piviusunngortikkumassavaa.
Anguniakkat pillugit paatsuuganartut
Tassani Múte Bourup Egede ersarissaasariaqarpoq nunatta siuttussaatut anguniakkani qanoq pingaartitsiginerlugu. Imaluunniit anguniakkatut akueriinnassanerlugu assersuutigalugu Siumumik naalakkersuisoqateqarluni politikkikkut sunniuteqarniarneq. Anguniakkatut oqariartuutit taakku marluk ataatsikkut oqariartuutigigaanni, oqariartuutigineqartut tukattutut isikkoqalersinnaapput, taamatullu siulittaasussamik nassaarniarnermi taartaaginnartussatut inissittooratarsinnaanera annerulissalluni.
Naalakkersuinikkulli siuttunngussagaanni partiip annerulernissaa kisimi naammanngilaq. Siuttuunissamummi aqqut maanna Demokraatikkoortariaqarpoq, tassanilu tatigeqatigiinnermik annertunerusumik pilersitsisinnaanissaq Múte Bourup Egedemut pingaaruteqarluinnassaaq. Demokraatit inissisimalluarnerminnik ilisimanninnerat maanna annertutillugu, taamaaliornissaq ajornaatsuinnaanavianngilaq.
Partiit taakku politikkikkut imminnut unammillertuupput, Demokraatillu partiit annerit ilaattut inissisimalernissaminik anguniagaqarlutik. Partii pineqartoq IA-p illuatungiliuttuuffigisaanut tapersersortaalluni maanna inissisimavoq.
Siulersortitut inissisimaffik
Múte Bourup Egede IA-p nunatsinni politikkikkut sunneeqataanissaanik suliaqalinnginnermini siulittaasutut qinigaaqqaartariaqarpoq. Qinigaassagunili akisussaaffimmik tigusisussatut piukkunnaateqarnerpaalluni parteeqatini uppernarsaaffigisariaqarpai.
Akisussaaffiup partiip iluani siammarnissaanik suliaqartariaqarpoq, partiillu iluani pikkoriffiit atorluartariaqarlugit. Namminersorlutillu Oqartussani siulittaasoqarfimmi partii allaffeqalissappat, Múte siulersortaanissaa qularineqartariaqanngila. Qulartoqassappammi partii ammut suli sisuuginnassaaq.