Naligiissaarineq
Naligiissaarinissaq nutaaq Illoqqortoormiuni ernumalersitsivoq
Naligiissaarinermi aaqqissuussineq nutaaq atulissappat sulluliap isuani qaamanerup takkutilersup aanngaaminissaa, Kommuneqarfik Sermersuumi kommunalbestyrelsemi ilaasortap aarleqqutigaa
Naligiissaarineq nutaaq pissutigalugu 56 millioner koruuninik sipaarniartariaqalersinnaaneq illoqarfimmut anginngitsumut Illoqqortoormiunut eqquinerlussinnaasoq, Atassut sinnerlugu Kommuneqarfik Sermersuumi kommunalbestyrelsemi ilaasortap Erling Madsenip aarleqqutigaa.
Kommunet 2009-mi kattussuunnerat sioqqullugu Illoqqortoormiut aningaasaqarniarnerat ilungersunartumik inissisimavoq. Maanna kommunerujussuanngorneq Illoqqortoormiut iluaqutigaat, taamaattorli ernumaammersimapput naligiissaarinermut aaqqissuusseqqinnissaq 56 millioner koruuninik Kommuneqarfik Sermersuup annaasaqaatigisussanngormagu.
- Aarlerinarpoq. Qaamaneqaleruttortoq manna saqqummiunneqarpoq, Atassut sinnerlugu Kommunalbestyrelsimi ilaasortaq Erling Madsen, Ittoqqortoormiineersoq oqarpoq.
Illoqqortoormiuni annertuumik suliffissaaleqisoqarpoq. Isumaginninnermullu aningaasaliissutit kommunet kattunneranni qaffassimagaluarput.
- Illoqarfitsinni isumaginninnikkut ikiorsiissutinik pisartagalippassuupput, taamaattumik ikilisaasoqassappat tamatta eqqugaanerlussaagut, Erling Madsen oqarpoq.