Kommunini naligiissaarineq
Naligiissaarinermik aaqqissuussinissaq unitsinneqarallarpoq
Qinersisoqartussanngorneratigut suliassat nutaat Inatsisartunit suliarineqartussaangaluartut unitsinneqarput. Tamanna aamma naligiissaarinermut aaqqissuussinissaangaluamut atuuppoq
Naligiissaarinermut aaqqissuusseqqinnissaq oqallisaasimaqisoq Inatsisartuni suliarineqartussaajunnaarpoq qinersinissap nalunaarutigineqarneratigut. Taamaammat kommuunit 2015-mut naligiissaarinissamut 2014-mut naatsorsuissutaasimasoq atorlugu agguaassiffigineqartussanngorput.
Atuaruk: Aningaasanik agguataarineq: Sermersooq
Aningaasaqarnermut Nunamullu Namminermut Naalakkersuisoqarfik taama tusagassiuutinut allappoq.
Siorna periusiusoq atoqqinneqassaaq
Taamaalilluni kommuuninut 2015-imut ataatsimoortumik tapiissutit, naligiissaarutit, inuit akileraarutaanneersuugallartut, ingerlatseqatigiiffiit akileraarutaat pissarsianillu akileraarutit malittarisassat isumaqatigiissutillu maannakkut atuuttut malillugit agguaanneqassapput.
Tamannalu pissaaq 2014-imut aningaasanut inatsit akuersissutigineqareersoq aamma 2015-imut Inatsisartut aningaasaliissutinut inatsisigigallagaat aallaavigalugu, naalakkersuisoqarfik taama allappoq.
Atuaruk: Isornartorsiueqqinneq: Aningaasanik agguataarineq suliarineqaqqilli, Vittus
Kisianni qinersinerup kingorna Nalaakkersuisunngortut ataatsimoortumik tapiissutinut naligiissaarinermullu ilusiliussassaasinnaasoq nutaaq pillugu kommuuninik oqaloqateqarniarsinnaanissaat ilimagineqarsinnaasoq, naalakkersuisoqarfik aamma allappoq.