nalimmassaanerup nutarternera
Naligiissaarineq pillugu aamma Qeqqani isornartorsiorneqarpoq
Qeqqata Kommuniani Demokraatit kommunini aningaasartuutitigut nalimmassaasoqarnissaa aamma ernumassutigaat
Naligiissaarinissamik iluarsartuusseqqinnissaq akuersissutigineqartussatut ilimagineqartoq Kommuneqarfik Sermersuumut 56 million koruuninik naleqassaaq, Qeqqata Kommunianut 12 million koruuninik naleqassalluni. Aningaasartuutit taama amerlatigisut ukiumut taama amerlatigisut annaaneqartalissapput. Tamanna aggustip aqqarngani aalajaniuneqassaaq.
Tamanna kommunimut akileraarutip 1,3 procentiata amerlaqatigigaa Qeqqata Kommuniani Demokraatinit René Boye Caspersenip oqaatigaa.
Borgmester Hermann Berthelsen, aningasarpassuit pilliutigilikkersaarnerinut atatillugu oqaaseqaateqanngivippoq, tamannalu René Boye Caspersenip Qeqqani Demokraatineersup tupigusuutigaa.
- Sooruna borgmesteri tamatumunnga akerliliinngitsoq, borgmesterit Siumumeersut marluk allat nuannaarniassammata 12 millionit imaasiallaannaq pilliutigissavagut?, René Boye Castersen tusagassiutinut nalunaarummi aperaaq.
12 millionit pineqartut Qeqqata ingerlatsinermut missingersuutaasa amerlaqatigaat, imaluunniit meeqqerivinnut ilaqutariinnillu katsorsaanermut ukioq manna kommunip atuinerata amerlaqatigalugit, René Boye Caspersen oqarpoq.
Qeqqani Demokraatit, inuussutissarsiuteqartut pitsaanerusunik atugaqalernissaat sulissutigeqqullugu Naalakkersuisut kaammattorpaat, Kalaallit Nunaat aningaasakilliornermit aniguiniarniassammat. Aningaasaliissutaareersut siunertaqanngitsumik agguataarneqarnerannut taarsiullugu.
- Vittus Qujaukitsoq nunatsinni atorfiit pingaarnersaanni atorfeqarnissaminut naleqqutinngilluinnarnerminik takutitsivoq. Akileraarutit amerlineqarnissaat, akitsuutit amerlineqarnissaat aningaasaliissutillu agguaateqqinneqarnissaat Qujaukitsup eqqarsaatigisinnaasatuarai. Nunatta qaffakkiartornissamik pisariaqartitsilerfiani.
Namminersorlutik suliffiutillit qaffariartortinneqarlik, suliffiit amerlanerusut pissarsiariniassagutsigit, taamaalillunilu aningasaqarneq uummarisseqqinniassammat, Qeqqata Kommunianit Demokraatit oqarput.
Tamanna pillugu borgmesteri Hermann Berthelsen Sermitsiaq.AG-mit oqaaseqartinneqarniarpoq.