Katsorsaavik
Nakuusertartut maanna katsorsarneqarsinnaalissapput
Katsorsaavik Alliaq sapaatip-akunnerata tulliani Nuummi ammassaaq
Inuit nakuusertartut maanna katsorsarneqarnissaminnut neqeroorfigineqarsinnaalissapput.
Katsorsaavik Alliaq ataasinngorpat ammassaaq, tassani aappaminnut peqqarniisaartartut kamassartarnermillu ajornartorsiuteqartut ikiorneqarnissaanik neqeroorfigineqarsinnaassapput.
Alliami suliarinninnermi periusaavoq inuit ataasiakkaarlugit tarnit nakorsaannit oqaloqatigineqartarneri. Suliarinninnerup nalaani katsorsarneqartup aporaannernik qaangiiniartarnerni, kiisalu missigissutsikkut sualuttumik attorneqartarnermik qaangerniarnissaat - annersaaneq atornagu ilinniartarpaat.
Pinaveersaartitsineq
Alliami suliniuteqarnerup nalaani aamma neqeroorutaasarpoq persuttaasartup aappaanik oqaloqateqartarnerit, katsorsarneqarnerup pitsaassusaa qaffakkumallugu aammalu aappaasup suliarineqarnerup kingorna nukittunerulluni piareersimanerullunilu inissisimanissaa anguniarlugu.
Alliap ammarneqarnera aappanik persuttaasarnerup pinaveersaartinneqarnerani alloriarneruvoq pingaaruteqarluinnartoq, naalakkersuisoq Sara Olsvig oqarpoq.
- Angerlarsimaffinni annersaasarnerit amerlasuutigut kinguariinnit nanginneqartarput, ilisimatuullu misissuinerisa aammalu sulinermi ilikkakkat takutereerpaat annersaanernik isigisaqartarnerit meeqqanut ajorluinnartunik kinguneqartartut ilisimavarput. Sunniuteqarnerpaamik inooqataanermi kingornussanik pitsaanngitsunik qimatsiniarneq tassaavoq aappanik annersaasarnerup unitsinneqarnissaa, Sara Olsvig oqarpoq.
Ammaaneq ataasinngorpat Katuami pissaaq.