napparsimmavik
Nakorsiartut aatsaat taama amerlatigisut Danmarkiliartinneqartartut
2016-imi nakorsiat 933-t Danmarkimut katsorsartikkiartorsimapput, tamannalu ukiut tallimat ingerlanerini aatsaat taama amerlatigipput.
Namminersorlutik Oqartussat aningaasaateqarfianut tamanna 2016-imi nakorsiat danskit peqqinnissaqarfianni katsorsarneqarnerat 128 millionit koruuninik akeqartitsivoq, Agathe Fontain, Peqqissutsimut aamma Nunat Avannarllit suleqatigiinnerannut naalakkersuisoq, Inatsisartunut ilaasortamut Henrik Fleischeimut Partii Naleqqameersumut akissuteqarluni ilisimatitsivoq.
Matumanili imminut assortuuttoq tassaavoq, 2013-imi nakorsiat Danmarkimukartinneqartarnerat 4,5 millionit koruuninik akisuneruvoq, naak taamanikkut ikinnerullutik 887-iugaluartut.
Henrik Fleischerip aamma kalaallit Nunatsinni katsorsarneqartaleraluarpata, Danmarkimullu nalinginnaasumik Rigshospitalimut angalaneq pinngitsoortaleraluarunikku saniatigut qanoq akeqassanersoq apeqqutigaa.
Agathe Fontainip tamanna eqqoriarsinnaanngilaa, tamannalu immikkut ilisimasalinnik amerlasuunik tamakkiisumik atorfinitsinneqarnissamut neqeroorfigineqarsinnaanngitsunik ilanngussisoqarnissaanik tunngavilersuivoq, napparsimasut amerlassusaat tamakkiisumik katsorsaanissamut tunngavissaqassannginnera pissutigalugu.
Kalaallit Nunaanni ullumikkut immikkut ilisimasallit pigineqanngitsut pisariaqartinneqartut ilaatigut makku taakkartorpai:
- Sianiutinik pilattaasartut
- Uummatit nakorsaat pilattaasartut
- Sinitsitsisartutut sulisut uummalluttunik sinitsitsinermik immikkut ilisimasallit
- Uummatinut puannullu maskiinanik atuinissamut teknikerit
Immikkut ilisimasallit arlalippassuit napparsimasunik ikittuaqqanut katsorsaanermut atorneqartussat.
Aammattaaq nakorsanik immikkut ilisimasalinnik atorfinitsitsiortornermi piumasaqaataassaaq peqqissaasunik immikkut ilinniarsimasunik soorlu assersuutigalugit:
- Sianiutitigut pilattaanermi peqqissaasut
- Sianiutitigut pilattarneqarsimasunut peruluttunut peqqissaasut
- Uummalluttunik pilattaanermi peqqissaasut kiisalu peqqissaasunut ikiortinik napparsimasunik katsorsarneqartunik paaqqutarinnillutillu paarsisussanik atorfinitsitsiortornissaq.
Tamatumunngalu uiggiullugu aamma Kalaallit Nunaanni peqqinnissaqarfimmi uku pisariaqartinneqassapput:
- Nappaateqartutut pissuseqartunut immikkoortortaqarfik
- Radiofysiologisk immikkoortortaqarfik
- Sianiutikkut fysiologisk immikkoortortaqarfik
Taakkulu immikkut ilisimasallit ilaannarigaat, Peqqissutsimut aamma Nunat Avannarliit suleqatigiinnerannut naalakkersuisoq akissummini allappoq.
- Tamanna misilinneqassagaluarpat Kalaallit Nunaannut annertuumik aningaasartuutaassaaq ullumikkumullu aningaasartuutaasartunut sanilliullugu akisungaatsiassalluni, Agathe Fontain naqissusiivoq.