peqqinnissaqarfik

Nakorsat tuluttut oqaluttut akuerineqarnissaat sulissutigaa

Peqqissutsimut Naalakkersuisup Doris Jakobsenip ilaatigut kalaallisut-tuluttut oqaluttaanermik ilinniagaqarneq pitsaanerusumik atortalerniarpaa

Nakorsat Kalaallit Nunaannut tikisikkuminaapput

Siunissami Peqqinnissaqarfimmut saaffiginnikkaangatta immaqa tuluttut oqartalissaagut ´hello´.

Nakorsanik amigaateqarneq sammivaa

KNR-p ulluni kingullerni nakorsanik amigaateqarneq sammivaa. Tamatumunngalu atatillugu ilaatigut nakorsat tuluttut oqaluttut atorneqarsinnaanerat saqqummiunneqarpoq. Siunnersuullu peqqissutsimut naalakkersuisup Doris Jakobsenip (S) ilalernartippaa.

Periarfissaq misissorlugu

– Nunami maani nakorsat sulinermi atugarisaasa pitsanngorsarnissaat Peqqinnissaqarfiup suliniutigereerpaa, nakorsat pilerinnilersikkusullugit attatiinnarusullugillu. Aammattaarli nakorsat nunani tallaneersut tuliuttut oqaluttut atorneqarsinnaanerat misissortariaqarparput, Doris Jakobsen tusagassiorfinnut nalunaarutikkut paasissutissiivoq, erseqqissarlugulu periarfissakkut tamatumuunakkut Naalakkersuisunit taperserneqarluni.

Imminnut paasisinnaassapput

– Taamaattumik nakorsat tuluttut oqaluttut nunami maani sulisinnaanerannut periarfissat misissorpavut. Napparsimasulli isumannaatsuunissat tamatigut sallersaatinneqartarpoq, taamaattumik napparsimasup nakorsallu kiisalu nakorsat sulisullu allat tamakkiisumik attaveqaqatigiissinnaanissaat qulakkiissavarput, Doris Jakobsen ilanngullugu oqarpoq.

Oqalutsit

Tamanna ilaatigut aaqqinneqarsinnaavoq kalaallisut-tuluttut oqaluttaanermik ilinniagaqarnerup pitsaanerusumik atorneqarneratigut. Taamaattumik Ilisimatusarfimmi Nutserinermik Oqaluttaanermillu Ilinniagaqarnermut Immikkoortoqarfik Naalakkersuisut qanimut suleqatigerusuppaat, Doris Jakobsen oqarpoq.

Nunani allamiunut aqutsisoqarfik

– Ukiuni kingullerni tamaviaarutigalugu sulissutigisimavarput nakorsat nunani allamiut ajornannginnerusumik Kalaallit Nunaannut pisalernissaat. Pissutsit ullumikkutut itsillugit Danmarkimi Nunani allamiunut Aqutsisoqarfik nakorsanut nunani allamiunut najugaqarnissamut sulinissamullu akuersissuteqartartuuvoq. Akuersissuteqartarneq pillugu qallunaat naalagaaffiat oqaloqatigaarput. Nakorsanut nunani allamiunut Kalaallit Nunaaliarnissaq sulinissarlu ajornannginnerussaaq, naalakkersuisunut ilaasortaq nangilluni oqarpoq.

Powered by Labrador CMS