qinersineq 2014
Nakorsat tuluttut oqaasillit
Peqqissunik sulisartoqassagaanni innuttaasut peqqissuusariaqarput toqqissisimallutillu. Inuussutissarsiorneq peqqissoq sulisunik toqqissisimasunik peqqissunillu pisariaqartitsivoq. Taamaattumik pisariaqarpoq nakorsanik amigaateqarnerup aaqqinneqarnissaa, taamaasiorsinnaavugullu nakorsanik nunanit allanit tikisitsinikkut, Jens-Erik Kirkegaard isumaqarpoq
Jens-Erik Kirkegaardip, Siumut tunuliaqutaralugu Inatsisartunut qinigassanngortittup, maanna inassutigaa peqqinnissaqarfimmut nakorsanik nunanit allanit tikisitsisalissasugut. Tamatumunnga tunuliaqutaavoq maanna ilisimareeratsigu utoqqaat amerliartortut sulisinnaasullu ikiliartortut. Aamma nalunngilarput nakorsanik amigaateqarneq ajornartorsiutaalereersoq, Jens-Erik Kirkegaard tikkuaavoq.
– Inuiaqatigiinni immikkoortoq pingaarutilik tassaavoq peqqinnissaqarfik ingerlalluartoq, nalunngilarput sulisut annertuumik kusanartumillu sulisut, pissutsit tatineqaraluartut. Aammattaarli ajoraluartumik ilisimavarput pisoqartartoq nappaatit kingusinaartumik paasineqartarnerannik, imaluunniit napparsimasut arlallit ukiut arlallit angullugit assersuutigalugu seeqqumikkut pilatsinnissaminnut. Kalaallit Nunaat nakorsanik amerlanerusunik atorfissaqartitsivoq nunamut nunassikkusuttunik, tamakkualu saniatigut nammineq nakorsanik ilinniagaqartitsisinnaavugut, Jens-Erik Kirkegaard tikkuaavoq. Kalaallit Nunaat nunarsuarmi nunani kisiartaanngilaq avinngarusimasumi inissisimasutut imaluunniit inukitsutut taaneqartartoq.
– Piffissanngorpoq nunarsuarmit tamarmit nakorsanik sulisussarsiulernissatsinnut, nakorsanik tuluttut oqalussinnaasunik, tamakkualu piginnaasaqarnerujussuupput, taanna isumaqarpoq
– Eqqaamassavarput aamma allanik nunaqarmat inukitsunik, tassa imaappoq nunat aamma nakorsanik ilinniagaqartitsisut, nalinginnaasumik ulluinnarni nakorsiartunik isumaginnissinnaasunik. Assersuutigalugu Australia. Aammattaarli nalunngilarput nuna soorlu Cuba, amerlasuunik piginnaasalinnik ilinniarluarsimasunik nakorsaqartoq, tamakkualu ilarpassui tulutt oqalussinnaapput.
– Upperaara nunanik immikkut toqqakkanik nakorsanik sulisussarsiornissaq siunertaralugu suleqatigiinnermik pilersitsisinnaasugut.
– Qularnanngilaq piumasaqaatitigut arlalitsigt teknikkikkullu unammilligassaqartoq aaqqinneqartussanik, soorlu nakorsatut sulisinnaanermut allagartat ilaalu ilanngullugit, tamakkuali aaqqinneqarsinnaapput, taanna isumaqarpoq.
– Assersuutigalugu unammilligassaavoq tuluttuumiit kalaallisuumut nutserisarnissat, maanna nutserisut amerlasuut qallunaatuumiit kalaallisuumut nutserisarput.
– Kalaallit Nunaanni amerlaqaagut ilisimannittt Nunavummi kippasinnerusuanilu inuit amerlasuut kalaallisut oqalunnermut ilikkajasuusut, tuluttullu oqalussinnaareerput.
– Periarfissaavoq misissussallugu Nunavummit, North West Territories-imit ilaalu ilanngullugit naggueqatigiinnik inunnik sulisussarsisinnaanersugut, taavalu kalaallisut oqalunnermut pikkorissartitsinernik aaqqissuussilluta, imaluunniit Sisimiuni oqaatsinik ilinniarfimmi ilinniagaqartitsilluta, ilinniagaqarfillu tassaassaaq tuluttuumiit kalaallisuumut nutserineq, tamannalu peqatigalugu maanna nutserisut ilaat ilinniarteqqissinnaavagut tuluttuumiit kalaallisuumut nutserinermik.
– Aamma naatsorsuutigisinnaavarput nunatsinni innuttaasut amerlanerusut tuluttuumiit kalaallisuumut nutserinermik ilinniarusussasut, Jens-Erik Kirkegaard siunnersuuteqarpoq.
– Pissutsit immikkut ittut immikkut ittumik aaqqiissutissarsiortariaqarput.
– Inatsisartunut qinigaassaguma ilaatigut periarfissat siuliani taaneqartut misissorneqarnissaat sulissutigissavara, qulaajarniarlugu qanoq isilluni tamakku piviusunngortinneqarsinnaanersut, Jens-Erik Kirkegaard oqarpoq.