Nakorsaaneqarfik mæslingertoqarmat mianersoqqusivoq

Danmarkimi Europamilu 2014-mi akiuussutissinneqanngitsut imaluunniit akiuussutissanik tamakkiisimanngitsut akornanni mæslingertoqalertoq, Californiami mæslingi navianaatilik 2014-imi decembari aallarnerfigalugu nappaalassutaalerpoq, tuniluunnerlu Disney-p nuannaariartarfissuanut attuumassuteqarluni.

Pisut taakkua aallaavigalugit nunatsinni Nakorsaaneqarfik maanna meeqqanik akiuussutissiisarnermut maleruagassiaq naapertorlugu akiuussutissiinissaq, angajoqqaanut tamanut kajumissaatigaa.

- Mæslingit tuniluutiasorujussuupput meeqqanullu puatsigut, siutitigut, uummatip nukiisigut qaratsakkullu aseruuttoornikkut kingunerlutitsisinnaasutut immikkut navianaateqarlutik. Nappaat toqussutaasinnaasarpoq, Nakorsaaneqarfik taama allappoq.

Akiuussutissamik pisartut ikilisimapput
Taama kaammaattuuteqarneranut aamma pissutaavoq Nakorsaaneqarfimmit naatsorsukkat naapertorlugit takussutissaqalersimammat angajoqqaat ikinnerusut meeqqamik akiuussutissinneqarnissaat isumagisaraat, taamaalillunilu meeqqat ikinnerusut akiuussutissat innersuussutaasut tamakkertaraat.

Tamanna pingaartumik meeqqani annerumaani atuuttoq, Nakorsaaneqarfik tusagassiuutinut nalunaaruteqarpoq.

Nunatsinni akiuussutissiinissamut maleruagassiami nukappiaqqat nappaatinut aqqanilinnut, niviarsiaqqalllu nappaatinut aqqaneq marlunnut illersuutaasussanik akiuussutissinneqarnissaat neqeroorutaavoq.

- Akiuussutissiinissamut maleruagassiap sunniuteqarluarnissaa meeqqat tamangajammik akiuussutissinneqarnissaannik piumasaqaatitaqarpoq. Taamaattoqanngippat, meeqqat inuusuttullu akiuussutissinneqanngitsut imaluunniit akiuussutissat ilaannik amigaateqartut akornanni nappaatit tuniluuttuarsinnaassapput, Nakorsaaneqarfimmit taama nalunaaruteqarput.