sullivinni avatangiisit
Nakkutilliineq ukiumut 8,3 millioninik akeqassaaq
Kalaallit Nunaanni Sullivinnik Nakkutilliisoqarfiup akisussaaffigilernissaanut aningaasartuutissat maanna qanoq amerlatigineri oqaatigineqarput
Naalakkersuisut sullivinnik avatangiisinut suliassaqarfik tiguniarlugu kissaatigaat, tassungalu atatillugu danskit sullivinnik nakkutilliisoqarfiata Nunatsinni immikkoortortaqarfia tiguniarlugu pilersaarusiorput.
Akia: Ukiumut 8,3 millioner koruunit, kiisalu ataasiarluni aningaasartuut 300.000 koruunit.
Ateq nutaaq sulisullu amerlanerusut
Immikkoortortaqarfiup atia Kalaallit Nunaanni Sullivinnik Nakkutilliisoqarfimmit Sullivinnik Nakkutilliisoqarfinngorlugu allanngortinneqassaaq, suliassallu kivinniarlugit aamma suliffeqarfinni atukkanik pitsaasunik qulakkeerinninniarluni sulisut ilaneqassapput.
Sullivinni avatangiisit pillugit Inatsisartut inatsisaannut nassuiaammi, Naalakkersuisut upernaakkut ataatsimiinneq sioqqullugu tusarniaassutigisassanngorlugu nassiussimasaanni tamanna atuarneqarsinnaavoq.
- Immikkoortortaqarfimmi ullumikkut sulipput ullup affaanut pisortaq, nakkutilliisut tallimat aamma allaffissornermi sulisoq ataaseq. Ullup affaanut pisortamut atorfik tigusinermi ulloq tamaat pisortamut atorfimmut qaffatsinneqassaaq, aammalu allaffissornermi sulisut ataatsimik ilaneqassallutik. Immikkoortortaqarfik tamatuma kingorna Sullivinnik Nakkutilliisoqarfittut nutaatut ingerlateqqinneqassaaq, nassuiaammi tamanna allaqqavoq.
Tapersersorneqarneq 1 millioninik akeqassaaq
Ilaatigut ukiumut akissarsianut aamma IT-mut aningaasartuutit 6,7 millioner koruuniussangatinneqarput.
Atuaruk: Sullivinnik Nakkutilliisoqarfik akisussaaffigilerniaraat
- Tassunga ilanngutissaaq, Sullivinnik Nakkutilliisoqarfimmi sulianut qaffasissumik ilisimasaqarnerup attatiinnarnissaa qulakkeerneqassappat, inatsisilerinikkut teknikkikkullu sulianut tapersersorneqarnissamik isumasioqateqarnissamillu pisariaqartumik annertunerusumik pisariaqartitsineq ... Tamatumunnga ukiumut aningaasartuutit annertussusaat, ingerlataqarnerit annertussusaat naapertorlugu nikerassasoq naatsorsuutigineqarpoq, aningaasaliissutit killiliussat 1,3 mio. kr.- it suleqatigiinnissamut isumaqatigiissummi aalajangersagaasut iluanni.
Allaffik nutaaq
Tamatuma saniatigut Sullivinni avatangiisinut aningaasartuutit 0,3 mio. kr.-iunissaat naatsorsuutigineqarpoq. Aningaasartuutit ataasiarluni akilerneqartussat 300.000 koruunit Sullivinnik nakkutilliisoqarfiup Nuummi allaffiinut atorneqassapput.
- Allamut inissiinernut aamma Nuummi allaffinnik ininillu, aqutsisoqarfiup nutaap illusimatinnissaanut atorneqartussanik, nutaamik aaqqissuussinernut atatillugu aningaasartuuteqarsinnaavoq, tamanna oqaatigineqarpoq.
Aatsitassarsiortoqarnerani aningaasartuutit ilaneqanngitsut
Sullivinni avatangiisinut inatsisissami naatsorsuutiginngisamik aningaasartuutit aatsitassarsiornermut aamma erngup nukinganullu suliassaqarfik piareersimaffigineqarput.
Siunnersuummi § 72-imi Sullivinnik Nakkutilliisoqarfiup aatsitassarsiornermut suliassaqarfiup kiisalu erngup nukinganut suliassaqarfiup iluanni nakkutilliinermut aningaasartuutaannut oqartussaasutut suliaqarnermut utertitsisarnissaq periarfissiissutigineqarpoq.
Atuaruk: Sullivinnut nakkutilliisoqarfik ukioq manna ulapaalaavissimapput
- Pisortanut aningaasartuutit aatsitassarsiornermut suliassaqarfiup iluani ingerlataqarnerulernermut atatillugu, annertunerulinnginnissaat maleruagassani qulakkeerneqarpoq, assersuutigalugu aatsitassarsiorfimmi suliassanik aallartitsinermut atatillugu, inatsisissatut siunnersuummi naqissuserneqarpoq.
Sullivinni avatangiisinut ilinniarneq
Sulisitsisut aamma ilinniarnermut aningaasartuuteqartarnissaat naqissuserneqarpoq.
- Kiisalu Sullivinnik Nakkutilliisoqarfiup sullivinni avatangiisinut ilinniartitaanermik ingerlatsineranut aningaasartuutinik matussutissatut sulisitsisunit akiliutinik akiliisitsisarnissamut § 71-imi periarfissiisoqarpoq.