silassat
Najukkami sumiiffinni 40-ni silassaq takuuk
Anileruit oqorsaaseqqaassavit? Asiaq sila pillugu nutaamik nittartagartaamini tamanna akissutissaqartippaa
Illoqarfimmi najukkanni, illoqarfimmi aanakkuit timmisartumik aallarfigisassaanni imaluunniit sineriak sinerlugu ingerlaarfigisassanni silap maannakkorpiaq qanoq innerata takunissaa aatsaat taama ajornanngitsigilerpoq.
Asiap sila pillugu nittartagaa nutarterneqaqqammersoq, aqqutigalugu illoqarfinnit, nunaqarfinnit sinerissap avataani sumiiffinnit 40-t sinneqartunit silamik nalunaarutit maannakkorpiaq atuuttut malinnaavigisinnaanngorpatit.
Paasissutissarpassuit
Tassani kiassuseq, anori, silaannaap naqitsinera, isikkivigissuseq allarpassuillu maannakkorpiaq atuuttut siusinnerusukkullu atuuttut takusinnaavatit.
Nittartakkami ataatsimoortumi, paasiuminartumi atoruminartumilu sila pillugu paasissutissanik attuumassutilinnik nutartikkanillu takusassaqarneq imaatigut nunakkullu isumannaallisaanermut pingaaruteqarpoq. Maanna silamut aninnginnermi eqqortumik atisalersornissaq ajornannginnerulerpoq.
Arctic Winter Games
Piffissaq nittartakkamik pilersitsiviusoq nalaatsornerunngilaq.
- Arctic Winter Games ingerlanneqaraluttualermat AWG-mi pisussat ataasiakkaat ataanni silap qanoq innerata takusinnaanissaa aaqqissuisunit isiginnaarianillu soqutigineqarluassaaq, suliniummut aqutsisoq Majbritt Westring Sørensen, tusagassiuutinut nalunaarummi oqarpoq.
Aamma Nuummi illoqarfiup qeqqani, mittarfimmi, sisorarfiit qaavani Qinngutsinnilu sila qanoq innersoq takuneqarsinnaavoq.
Atuaruk: Asiaq nutaamik pisortartaarpoq