atuarfiit

Najukkami atuartut iluarisimaarnerat pillugu misissuititsinissaq akisuallaartoq

Kommuneqarfik Sermersuup nuna tamakkerlugu meeqqat atuarfiini iluarisimaarneq pillugu misissuititsinissamik siunnersuut eqqartuipput

Det er lærere og skoleinspektører, der gætter på, hvordan børnene har det. Arkivfoto

Meeqqat atuarfiini meeqqat qanoq ippat? Tamanna eqqoriarluarneqarsimanngilaq. Massakkummi ilisimasat Kommeqarfik Sermersuumi ilinniartitsisut atuarfiillu pisortaasa naliliineri kisimik tunngavigilersuutigineqarput.

Sulisunik arlalinnik pisariaqartitsisoq

Tamaammaat Kommuneqarfik Sermersuumi Meeqqanut Atuarfeqarnermullu Ataatsimiititaq novembarip qaammataani apeqquteqarpoq, atuartut akornanni iluarisimaarinninneq pillugu misissuititsisoqarsinnaanersoq. Tamannalu pisariuallaarlunilu akisuallaassasoq, ingerlatsiviup nalilerpaa.

- Ingerlatsivik Kommuneqarfik Sermersuumi taamaallaat atorneqartussamik atuartut iluarisimaarinerannik misissuinissamut suliaqarnissaa aningaasaqarnikkut sulisutigullu pissusissamisuussanngitsoq ingerlatsivimmit nalilerneqarpoq, ingerlatsiviup aqagu ataatsimiititamut ataatsimiittussamut saqqummiussaani allassimavoq.

- Naammattumik qaffasissumik pitsaassusilimmik misissuinissamut annertuumik kisitsisitigut periutsinillu ilisimasaqarnissaq piginnaasaqarfigineqartariaqarpoq - tamakku maanna atuarfeqarnermut immikkoortortami ingerlatsivimmilu pigineqanngillat.

Tassa taamatut angusaqarfiulluartumik misissuititsisoqassappat immikkut ilisimasaqarnissaq pisariaqarpoq.

Nuna tamakkerlugu misissuineq

Taamaammat ingerlatsiviup siunnersuutigaa, nuna tamakkerlugu misissuinermik ingerlatsisoqassappat Namminersorlutik Oqartussat saaffigineqassasut.

- Maanna ingerlatsivik Ilinniartitaanermut Aqutsisoqarfimmut saaffiginnissuteqassaaq nuna tamakkerlugu atuartut iluarisimaarinerannik misissuinissamut periarfissamik pilersitsinissaq apeqquteqaatigalugu naatsorsuutigineqarmat Nuna tamakkerlugu atuarfinnit tamanit iluaqutigineqarsinnaassasoq, innersuutigineqartumi allassimavoq.

Tamannalu iluatsinngippat, Kommuneqarfik Sermersooq avataaniit misissuititsinissamut aningaasanik immikkoortitsisariaqartoq, ingerlatsivik naliliivoq.

Meeqqanut Atuarfeqarnermullu Ataatsimiititami politikerit aqagu ataatsimiilerunik qulequtaq oqaluuserissavaat.

Powered by Labrador CMS