maajunnaq
Najugaqartoq: Terissat ukiut qulit inooqatigaagut
Sisimiuni Aqqartarfik 2-mi teriarpassuaqarnera aatsaat pilinngitsoq najugaqartoq oqaluttuarpoq
- Nuannaajallaqaagut teriarpassuit Aqqartarfik 2-mi iliuuseqarfiginiarneqalermata. Terissat ukiut qulit inooqatigisimavagut qatsulluinnarlugillu, Aqqartarfik 2-mi najugalik aterminilli saqqummiusserusunngitsoq oqaluttuarpoq.
Inigisaannilli assit namminneq oqaluttuarput imaannaanngitsumik ajornartorsiuteqartoq.
- Inissiani unnukkut eqqissiimisoqartorlu terissat angallappalulersarput. Fjernsynerusaarniarluta naqqup ataatsigut ingerlaarpaluttarput qataatsumillu nilliarpaluttarniarlutik, najugaqartoq Sermitsiaq.AG-mut oqaluttuarpoq.
Inuunilunneq
Terissalli nipiliornerat kisimi ajornartorsiutaanngilaq.
- Sanasut nillataartitsiviup toqqaviani qisuit peermatigit terissat toqungasut mikiarlutik tippaattut nuipput. Ruujorit aqqutaanni assiaqutit aamma peermata ilaatigut qernaaluttuinnaavoq tipittorujussuullunilu, najugaqartoq oqaluttuarpoq.
Teriarpassuaqarneranik ajornartorsiut eqqakkanik nakkartitsiviup eqqaani aallartippoq maannalu inissiarsuup sinneranut ajornartorsiut siaruaassimavoq.
- Inigisarput tipittalersimavoq piffissamilu sivitsortumi niaqorloqqajaaneq inuunilunnerlu atugarilersimavakka, najugaqartoq oqaluttuarpoq.
- A/S Inissiaateqarfik Inimeersut siunnersorsimagaluarpagut suleqatigiilluta inissiarsuup qaliarsuanut pullatilersorsinnaalluta. Qanorli iliortoqanngilaq. Allaanngilaq aatsaat oqalulerama manna tusagassiutinut saqqummiunniarlugu qanoq iliuuseqartoqalersoq, najugaqartoq oqarpoq.
A/S Inissiaatileqatigiifik Ini maanna ammanernik milissuivoq tamannalu naammassippat terissanik toqoraaneq aallartinneqassaaq.