silaannakkut angallanneq

Naja Lund: Kujataani qulimiguulik S61 angallassisaleqqittariaqarpoq

Silaannakkut angallassinermi annertuumik pitsanngorsaasoqartariaqarpoq, Naja Lund taama isumaqarpoq. Taanna qulimiguulik S61 atorunnaarneqartoq iluaqutigalugu atorneqarsinnaagaluartoq.

Naja Lund mener, at Naalakkersuisut med fordel kunne få S61-helikopteren til at flyve i Sydgrønland.

Timmisartuussilluni angallassinikkut periarfissat Kujataani innuttaasunut pitsanngornissaat piffissanngorpoq. Kommune Kujallermi kommunalbestyrelsimut ilaasortaq Naja Lund (IA) taama oqariartuuteqarpoq.

- Angallassinissamut kiffartuussinissamik isumaqatigiissut 1 jan 2017 atuutsilermat kujataamiut silaannakkut kiffartuuneqarnerat ajorseriaqqippoq. Naak imaatigut ukiorpassuit kiffartuunneqarsimanngereerluta periarfissaqaqqilernerput pittaasuugaluartoq taamaattoq ilisimavarput silaannakkut kiffartuunneqarnerput pittannguuteqanngilluinnarmat, Naja Lund oqarpoq, nangillunilu:

Angallanneq kigaannerujussuarmik ingerlasoq
- Ilisimavarpummi ukiualuit matuma siorna qulimiguulik S61 kujataani inunnik nassiussanillu angallassissutitut atorunnaarmat B212-nillu taarserneqarmata ajorseriarneq siulleq pimmat, massakkulli suli ajornerulerpoq B212 aasaanerani ataaseq ukiuuneranilu qaammatini tallimani qulimiguullit B212-it marluk atorneqartarmata.

- Tamassuma nassataraa inuit angallanneqartussat piffissaq sivisuneq atorlugu Narsarsuarmut Narsarsuarmiillu angallanneqartalernerat kiisalu nassiussat allakkallu kigaalaarnerusumik apuunniartalernerat, allaat nassiussat asioqqajaasut asioreerlutik pisiniarfinnut apuuttalernerat.

Naja Lund taama isornartorsiuivoq.

Qulimiguulik S61 atorneqarli
Qulimiguullip S61-p ukiuunerani atorneqarneratigut ajornartorsiutit ilaat aaqqiiffigineqarsinnaasut taanna isumaqarpoq.

- Kujataani angallannerup kipiluttunarsisimaqisup aaqqiiviginissaa pisariqavippoq, aaqqiinissarlu pisariaqavimmat Air Greenlandip qulimiguuliutaa S61 atorunnaarsimagaluartoq maanna suliareqqinneqalersup ukiuunerani kujataanut inissinneqarnissaa pisariaqavippoq, tassani sillimanianermut piareersimasuujutigaluni ilaasunik angallassissutitut atorluarneqarsinnaammat soorluttaaq massakkut B212 Qaqortumi upalungaarsimasuusoq aamma taamak atortoq, tamanna kujataani silaannakkut angallannermut anneertuumik pittannguutaasussaavoq.

Naalakkersuisut sisamat - angusaqarfiunngitsoq
Naja Lund naapertorlugu naalakkersuisut assigiinngitsut sisamat pitsannguinissamik neriorsuuteqarsimapput - tassanilu angusaqartoqarsimanani.

- Angallannermik kiffartuussinissamut isumaqatigiissut nutaaq aalajangiunneqarmalli angallannermut naalakkersuisut assigiinngitsut sisamat tamarmik kujataanut ataatsimiisitsiartortarput tamarmillu neriorsuuteqartarlutik iliuuseqartarlutillu naamaginartumik sullissinermik kinguneqanngitsunik, Naja Lund oqarpoq, Naalakkersuisunullu kajumissaarivoq.

- Naalakkersuisut ersarissumik aaqqiissuteqassagunik pisariaqarpoq S61-ip kujataanut inissinnissaa, tamannalu kujataamiut kissaatigigaat naalakkersuisut ilisimagaat naluneqanngimmat sulissutigillaqqunaqaaq, Naja Lund oqarpoq.

Powered by Labrador CMS