Qaffasissumik atorfinittoq
Naja H. Nathanielsen Pinerluuteqarsimasunik Isumaginniffimmi atorfikkaanngorpoq
Politikeriusimasoq Kalaallit Nunaanni Pinerluuteqarsimasunik Isumaginniffimmi pisortanngussaaq
Ataqqinartorsuup Dronningip ullumi Naaja H. Nathanielsen, Inatsisartut upernaakkut ataatsimiinnerisa kingorna nunatsinni politikkimit tunuartoq, Kalaallit Nunaanni Pinerluuteqarsimasunik Isumaginniffimmi pisortanngortippaa.
Aggustip aallaqqaataanit sulilissasoq Pinerluuteqarsimasunik Isumaginniffik tusagassiorfinnut nalunaarutikkut paasissutissiivoq.
Pisortaq soraarninngussaaq
– Kalaallit Nunaanni Pinerluuteqarsimasunik Isumaginniffimmi sulilernissara qilanaareqaara. Atorfimmi tassani inunnik inuiaqatigiinnillu ilisimasakka aqutsinermi suliffeqarfiullu ineriartortinneranut iluaqutigisinnaavakka, taanna tusagassiorfinnut nalunaarummi oqarpoq.
Naaja Nathanielsenip kingoraassavaa maanna pisortaasoq Hans Jørgen Engbo, juulip aallaqqaataani soraarninngortussaq.
Naaja Nathanielsen ukioq manna siusinnerusukkut nalunaarpoq Inuit Ataqatigiinnit aniniarluni. Tamatuma kingorna attaviitsunngorpoq, qaammammi matumani siusinnerusukkut upernaakkut ataatsimiinnerup naanerani politikkimit tunuarnissmi tungaanut.