Naja Arcticap maskinaqarfiani ikuallattoorneq

Royal Arctic Linep umiarsuaata, Naja Arctica, Aalborgimi umiarsualivimmi tallimanngornermi ullaap tungaani talinngatilluni maskinaqarfimmigut ikuallattoqaleraluarpoq.

Ilimagineqarpoq illoqarfimmeersut maskinaqarfimmut suliartortut suliaqarneranni ikuallanneq aallartissimassasoq.

- Umiarsuarmi inuttat pilertortumik iliuuseqarneratigut ikuallanneq pujuliortitsigaatsiareeraluartoq umiarsuarmi inuttanit nammineerluni qaminneqarpoq, qujanartumillu umiarsuarmi inuttanik imaluunniit illoqarfimmmit maskinaqarfimmut suliartortunik ajoqusertoqanngilaq. Qatsereqataasut arlallit qatsereernermik kingorna pujumik iioraasimanersut paasiniarlugu misissorneqarput, maannali umiarsuarmut tamarmik utereerput.

Taama Royal Arctic Line tusagassiuutinut nalunaaruteqarluni allappoq.

Royal Arctic Linemit aamma ikuallannerup umiarsuarmut annertunerusumik ajoqusiisimannginnissaa nalilerneqarpoq, kiisalu pilersuinermut ikuallattoornerup sunniuteqarsinnaanera aamma ilimagineqanngilaq.