Naatsorsuutigisamit aatsitassat amerlanerusut

Dundas Titanium-imut pisortaaneq Hans Jensen ulluni makkunani nuannaarpoq. Ingerlatseqatigiiffiummi Moriusap eqqaani ilmenit 96 million tonsimik 6,9 procentimillu akulimmik aatsitassaqartoq saqqummiuteqqammerpaa.

- Maanna naatsorsuutigisimasatsitut peqarnera ilisimalerparput. Neriuutigisimasatsinniillu amerlanerulaarput, Hans Jensen Sermitsiaq.AG-mut oqarpoq.

Annertunerusumik nassaarnissaq ilimagineqartoq

Ingerlatseqatigiiffik nunarsuarmi ilisimaneqarluartoq SRK Consulting ukioq kingulleq misissuinerit misileraanermik ilaqartoq aallaavigalugit misissuitinneqarpoq. SRK-p aatsitassat peqassusiannik misissuisarneq immikkut ilisimasaqarfigaa.

- Kisitsisit illersorsinnaasatik kisiisa atortarpaat. Tamanna aningaasaliisartunut pingaaruteqarluinnarpoq, suliniummummi aningaasaliinissamut pissutissaqarluartoq taakku takusinnaalerpaat, Hans Jensen nassuiaavoq.

Moriusami suliniutigineqartup saniatigut Iterlap eqqaani aamma piiaaffiusinnaasumik nassaartoqarpoq. Sumiiffinnilu taakkunani marlunni minnerpaamik 96 million tonsimik aatsitassaqarnera ilimagineqarpoq.

- Taassuma saniatigut suliffeqarfik ingerlatseqatigiiffinni siullersaalluni Kalaallit Nunaanni aatsitassarsiornissaa akuerineqarsimavoq. Ilimagineqarpoq, sissami aatsitassat nunamiittuniit annertunerunissaa. Tamanna eqquutissappat, ullumikkut nunarsuatsinni aatsitassaqarfinni ilisimasatsinniit annertunerujussuussaaq, Hans Jensen oqarpoq.

Aningaasaliisartunit soqutiginninneq

Ingerlatseqatigiiffiup piaasinnaanermut akuersissutaa siulleq aasamut tunniutissallugu, Dundas Titaniumip naatsorsuutigaa. Suliniutip akilersinnaassusaata misissorneqarnera (feasebility study) naammassineqaleruttorpoq, taanna inuiaqatigiinnut kingunissaata misissorneqarneranut (SIA) ilaavoq, avatangiisinullu sunniutissaanut (VVM) nalilersuinermi paasisat kingulliit aasaanerani katersorneqassapput. Taakku qinnuteqarnermi piareersimasussaapput.

- Aningaasaliisussat inissereerput, ukiormannalu programmi aappagulu aallartinnissaa suliarisinnaavarput, Hans Jensen oqarpoq.

SRK-mit kisitsisit pitsaatillugit Dundas Titanium, ingerlatseqatigiiffik piaanissamut akuersissummik pissarsissaguni, piaanissamut aningaasaliisussanik pissarsinissamut tunngatillugu nukittuumik inissisimassaaq.

- Pitsaasunik atassuteqarpugut, aningaasaliisartunilu arlalinnit pitsaasumik ilisimatinneqarpugut, Hans Jensen oqarpoq.

Suliniutit arlallit Nunatsinnut iluaqutaasut

Piiaanerup piaarnerpaamik aallartinnissaa neriuutigaa. Titaniumip akii massakkut qaffasimmata, suliniummut tamanna pitsaaqutaassaaq. Kisianni aamma nunap iluaqutigissavaa, allanik – suliniutinik anginerusunik – malitseqarsinnaammat, Hans Jensen naliliivoq.

- Suliniummik taama suliariuminartigisumik ‘ilinniarfeqarnissaq’ pitsaasuuvioq. Suliariuminartuuvoq, suliniutillu ingerlasut amerlanerutillugit, Kalaallit Nunaata aatsitassarsiorfittut tusaamaneqarnera nukittunerulissaaq, pisortaq oqarpoq.

Suliniutip nukittoqutigisaata ilagai, aatsitassaq titaniup, ilmenit, ajornaatsunngorlugu oqaatigalugu sissamit qallorneqarsinnaapput. Sumiiffimmi ilmeniteqassusaa nunarsuarmi qaffasinnerpaavoq.