Naatsorsuutaanngitsumik nunatta karsiani sinneqartoorneq nuannaarutigineqartoq

2016-mi aningaasanut inatsimmi 260 mio koruuninik amingartooruteqarnissaq naatsorsuutigineqarsimavoq. Kisianni inerniliussaq 51 mio koruuninik sinneqartoorfiusimavoq - tassa 311 mio koruuninik pitsaanerulluni.

Tamanna Siumup politikkikkut oqaaseqartartuata Jess Svanep nuannaarutigaa.

- Ukioq 2016 kingumut qiviarlugu Nunap naatsorsuutai nalilerutsigit iluatsiffioqaaq, aamma pikkorissimaqaagut, taanna tusagassiuutinut nalunaarummi oqarpoq.

Aalisakkat akigissaartut

Aalisakkat nunarsuarmi niuffattarfinni aalisakkat akigissaarsimanerannut sinneqartoortitsivoq. Aammalu aningaasarsiornikkut ingerlalluartoqarsimavoq tamannalu Namminersorlutik Oqartussat suliffeqarfiutaasa aningaasat selskabskatikkut tunniussaqarsimanerini takuneqarsinnaavoq.

Aalisakkanit raajanillu akigititaasut allanngorpata aningaasat isertinneqartut appariaqqissinnaapput.

Sukannersumik aqutsigallartoqassasoq

Akileraartarnermut Aningaasaqarnermullu Naalakkersuisoq, Aqqaluaq B. Egede (IA) naatsorsuutit saqqummiukkamigit silatusaarnissamik oqaaqqissaarivoq.

- Aningaasaqarnikkut inernerusut pitsaasut maannamit eqqissisimaarluta uninngaannalernissatsinnik aningaasartuutillu aqunneqaratik qaffakkiartortinnissaannik pissutississanngilaatigut. Killormuanilli pingaaruteqarpoq, aalajangersimasumik siunnerfeqarluta ingerlaannarnissarput aningaasaqarnermillu sukangasuumik aqutsinissarput attatiinnassagipput, taanna taama nalunaaruteqarpoq.

- Aningaasat mittarfinnut atorneqarlik

IA-llu politikkikkut oqaaseqartartua Bendt B. Kristiansen aamma mianersoqqusivoq.

- Ukiut aningaasarsiorluarfiusut siunissami ineriartoqqinnissamut aningaasaliiffiussapput, taanna tusagassiuutinut nalunaarummi allappoq.

Aningaasat Ilulissani, Nuummi Qaqortumilu atorneqarnissaannut taanna siunnersuivoq.

- Ukiunilu makkunani tulluarsinnaavoq sinneqartoorutaasut amerlanersaat Kalaallit Airport A/S-ip naleqarnerulersinneqarnissaannut illikartissallugit, taanna taama nalunaaruteqarpoq.*

Jess Svane (S) aamma taama isumaqarpoq, mittarfiimmi siunissami ineriartortitsinermut iluaqutaassapput, takornarialerinermimi suliffinnik pilersitsisussaammata.

- Tamanna pillugu aamma takorloorneqareersinnaavoq s.a. aalisartut, piniartut aammalu sanaartornerup iluani sulisut siunissami takornariaqartitsinerup iluani aamma saniatigooralugu suliffeqallattaarumaartut, taanna taama isumaqarpoq.

Aamma atuaruk: Nunatta karsia sinneqartuungaatsiartoq

Aaqqissuusseqqinerit pisariaqartut

Grønlandsbankenimi pisortaanerup, Martin Kviesgaardip, politikerit kaammattorpai ingerlalluarallarneq aaqqissuusseqqinnissamut atussagaat.

- Maanna killiffiup pitsaasuunera politikerit Inatsisartullu pikkorissut pisortat aaqqissugaanerannik aaqqissuusseqqinnissamut soorunami aallartitsiffigissavaat, taanna KNR-mut taama oqarpoq.