Naatsorsueqqissaartarfiup nalliuttorsiornermini tunissuteqartoq

Juulip 19-iani 1989-mi Aningaasaqarnermut, Niuernermut aamma Angallassinermut taamani naalakkersuisoq Emil Abelsen aamma Naalakkersuisut siulittaasuat Jonathan Motzfeldt 'Kalaallit Nunaanni naatsorsueqqissaartarneq pillugu inatsisartut inatsisaat nr. 5, 19. juli 1989-imeersoq' atsioqatigiissutigaat. 1989-ip ingerlanerani Kalaallit Nunaanni Naatsorsueqqissaartarfik pilersinneqarpoq.

Ukiunik 25-inngortorsiorneq malunnartinniarlugu Naatsorsueqqissaartarfiup Ukiumoortumik kisitsisitigut paasissutissat e-boginngorlugit aaneqarsinnaasunngortippai, Naatsorsueqqissaartarfiup pisortaa Anders Blaabjerg nalunaarpoq.

Naatsorsueqqissaartarfiup nittartagaani stat.gl-imi e-bogi epub-itut pdf-itulluunniit aaneqarsinnaavoq.

Suliassanik aaqqissuussinermi pisortat aningaasaliissutaat tunngavigalugit aamma akiliilluni suliakkiissutit tunngavigalugit kisitsisitigut paasissutissat suliarineqartussat Naatsorsueqqissaartarfimmit aalangersarneqartarput. Sammisamik aalangersimasumik kisitsisitigut paasissutissat saqqummersinneqartarput Ukiumoortumik kisitsisitigut paasissutissani imaluunniit saqqummiussani.

Taakku saniatigut Naatsorsueqqissaartarfimmit inuinnarnik imaluunniit pisortanik immikkut paasisaqarusuttunik sullissisisoqarsinnaavoq.