qinersineq
Naatsorsueqqissaartarfiup kisitsisaataasa takutippaat Dorisip oqaasii eqqunngitsut
Siumumit Doris Jakobsenip Kommuneqarfik Sermersuumi sulisorineqartut pillugit oqaaserisani eqqunngitsumik oqaaseqarfigai
Inatsisartunut qinersinissamut qineqqusaartut oqallinneranni oqaaserineqartut amerlapput, ilaallu aamma eqqortuuneq ajorlutik.
Doris Jakobsenip qineqqusaarnerminut atatillugu oqarpoq, Kommuneqarfik Sermersooq kalaallinik ilinniarluarsimasunik atorfinitsitsinaveersaartartoq. Aamma borgmesteri Asii Chemnitz Narup naapertorlugu Doris Jakobsenip oqaatigaa kommunimi atorfiit akissarsiakinneruffiusut kalaaliinnarnik inuttalerneqartartut.
Tamanna pillugu Kalaallit Nunaanni Naatsorsueqqissaartarfiup misissuinerata takutippaa oqaaserineqartut eqqortuunngitsut.
Misissuinerup takutippaa, kommunimi sulisut 91 procentii Kalaallit Nunaanni inunngorsimasuusut, aamma 96 procentii nunaqavissuusut.
- Aammattaaq atorfiit qaffasissut tikisitanik kisimi inuttalerneqartarnerannik oqarneq ilumuunngilaq. Misissuinerup takutippaa, sulisut 88 procentii sivisuumik ilinniagaqarsimasuusut tassaasut nunaqavissut, taakkunanngalu 92 procentit akunnattumik sisivissusilimmik ilinniagaqarsimasut, Asii Chemnitz Narup tusagassiutinut nalunaarummi erseqqissaavoq.
- Atorfiit taamak amerlatigisut nunaqavissunik inuttalerneqarsimaneri takullugu nuanneqaaq, pingaartumik qanoq piginnaasaqarneri isiginiarneqartarnerat eqqarsaatigalugu. Nunatsinni qineqqusaartoqarnerani politikkikkut saassutarineqartarnerput avaqqukkuminaatsuusoq ilisimavarput, nunatsinnili qaffasinnerpaamik inissisimasussatut qineqqusaartoq isummanik pigiliutiinnakkanik tunngaveqarluni qineqqusaarnera pakatsissutigaara, Asii Chemnitz Narup oqarpoq.