Tuesday, May 9, 2017 - 11:30

Naatsorsueqqisaartarfimmi siulersuisut ajunngitsorsiaqartinneqaleriasaartut

Naatsorsueqqissaartarfiup siulersuisuini ilaasortanut immikkut ajunngitsorsiaqalersitsinissaq Inatsisartut aalajangiiffigissavaat.
Assi.: Leiff Josefsen
Inatsimmik allannguineq inummik ataatsimik taamaallaat iluaqusiisussanngorlgu ilusilerneqarpoq. Naatsorsueqqissaartarfiup siulersuisuini ilaasortanngorlaaq pisarneq akimorlugu ukiumut Ajunngitsorsiaqartinneqaleriasaarpoq.

Manna tikillugu Naatsorsueqqissaartarfiup siulersuisuini ilaasortaaneq akissarsiaqarfiunngitsumik pisarpoq.

Inatsimmik allannguineq tusarniaassutaasoq

Mannali - Henrik Lethip persaqqusersuutaaqisumik soraarsitaanerata kingorna - Naalakkersuisut inatsimmut allannguutissamik saqqummiussipput, taannalu maanna tusarniaassutigineqarpoq.

Aaamma atuaruk: Naalakkersuisut Henrik Leth maannaannakkut soraarsikkaat

Nutaatut ilaasortaq Tønnes Berthelsen, Aalisartut Piniartullu Kattuffianni KNAPK-mi pisortaagallartoq kisiat iluaquserneqartussanngorlugu inatsimmik allannguineq ilusiligaavoq.

- Naatsorsueqqissaartarfiup siulersuisuini ilaasortat aktiaatileqatigiiffinni namminersorlutik oqartussanit pigineqartuni siulersuisuni ilaasortat ajunngitsorsiaasa affaanik annertussuseqartumik annerpaamik ajunngitsorsitinneqarnissaannik Naalakkersuisut aalajangersaasinnaanerat siunnersuutigineqarpoq. Taamaaliornermi ilaatigut Naatsorsueqqisaartarfiup siulersuisuini ilaasortanut ajunngitsorsiap suliassanik persaqqusersuinermut naapertuuttuunissaa innersuussutigineqarpoq. Ajunngitsorsiaq ullumikkut 25.000 kr-inik annertussuseqartoq siunnersuut pillugu nassuiaatini, kattuffinnut arlalinnut tusarniaatigineqartumi allassimavoq.

Ilaatinneqanngitsut

Tønnes Berthelsenip kisimi siulersuisuni ilaasortatut atuuffimmini ajunngitsorsiaqarnissaa, inatsimmik allannguinermi nassuiaatini inuit "pisortani pisortalluunniit kattuffiini, soorlu qitiusumik allaffeqarfissuarmi, KANUKOKA-mi, kommunini Pinngortitaleriffimmiluunniit" suliffeqartut ajunngitsorsiaqartussaannginnerannik allassimasunik patsiseqarpoq. Tønnes Berthelsen taakkunani allassimasuni kisiartaalluni pineqanngilaq.

Aamma atuaruk: Nassuiaat nutaaq: Inuussutissarsiornermut soqutigisat Lethip soraarsinneqarneranut pissutaapput

Siulersuisuni ilaasortat allat pingasut atorfeqarnertik pissutigalugu ajunngitsorsitinneqarsinnaanngitsut tassaapput Kim Neuman Nielsen, Akileraartarnermut Aqutsisoqarfimmi pisortaq, Mitdlarak Lennert, Ilisimatusarfimmi ph.d-ngorniaq kiisalu Lulu Nielsen, Kommuneqarfik Sermersuumi fagchefitut atorfilik.

Siulittaasoq akuutinneqanngitsoq

Siulersuisunut siulittaasoq Vøgg Løwe Nielsen ajunngitsorsiaqarnissaq pillugu aalajangernermut akuutinneqarsimanani Sermitsiaq.AG-mut oqarpoq.

- Isumaga naapertorlugu siulersuisunut ilaasortat tamarmik suliaminni ajunngitsorsitinneqarnissaat naapertuutissaaq, ilaasortammi suliffitsik sinnerlugu ilaasortaanatillu sunngiffimminni ataatsimiinnissaminnut piareersartarput. Ilaasortat ataatsimiinnerni tamani peqataalluartarput, naatsorsoqqissaakkallu nutaat piareersarneqalernerini immikkoortuni immikkut ilisimasatik atugassanngortillugilluunniit, pineqartuni immikkut ilisimasalinnik ikiuussinnaasunut innersuussisarput, Vøgg Løwe Nielsen Sermitsiaq.AG-mut oqarpoq.

Aamma atuaruk: Lethip soraarsinneqarsimaneranut nassuiaat nutaaq

Siulersuisuni ilaasortanngorlaaq Tønnes Berthelsen inatsisissatut siunnersuut pillugu oqaaseqarumanani Sermitiaq.AG-mut nalunaarpoq.

 

Seneste nyheder / Nutaarsiassat kingulliit